جەكەمەنشىك مەكتەپتەردەگى كەمشىلىكتەردى جويۋ ماقساتىندا ءتيىستى ەرەجە قابىلداۋ جوسپارلانىپ وتىر. بۇل تۋرالى وقۋ-اعارتۋ ءمينيسترى عاني بەيسەمبايەۆ بۇگىن پارلامەنت پالاتالارىنىڭ بىرلەسكەن وتىرىسىنان كەيىن مالىمدەدى.

جۋرناليستەر مينيستردەن جەكەمەنشىك مەكتەپتەردى قارجىلاندىرۋ ماسەلەسىنە قاتىستى سۇراق قويدى.

– جەكەمەنشىك مەكتەپتەردى قارجىلاندىرۋ كەشىگىپ جاتقان جوق. بارلىق قاراجات ءبولىندى. قازىرگى تاڭدا تەك 2-3 وڭىردە عانا قارجىنىڭ اۋدارىلۋىنا بايلانىستى جەكەمەنشىك مەكتەپتەردىڭ اكت تاپسىرۋ ۇدەرىسىندە كىدىرىس بار، – دەدى مينيستر.

سونداي-اق تىلشىلەر تاراپىنان «ەگەر جەكەمەنشىك مەكتەپتە 200 وقۋشىدان از بولسا، ول جابىلادى دەگەن اقپارات راس پا؟» دەگەن سۇراق قويىلدى.

– سوڭعى جىلدارى مەملەكەتتىڭ قولداۋى ارقاسىندا كەيبىر كاسىپكەرلەر 20-30 وقۋشىنى جيناپ، ەشقانداي ينۆەستيسيا سالماي-اق مەكتەپ اشىپ جاتىر. ال نەگىزگى ماقسات – جەكە ينۆەستيسيا ارقىلى مەكتەپ سالۋ، ينفراقۇرىلىمدى دامىتۋ. ءبىزدىڭ بايقاۋىمىزشا، جەكەمەنشىك مەكتەپتەردىڭ 60-70 پايىزى ەشقانداي جاڭا عيمارات سالماعان، بۇرىننان بار نىسانداردى بەيىمدەپ قولدانىپ وتىر. مۇنداي جاعدايدا اتا-انالاردى الداماي، ساپالى ءبىلىم بەرۋ – باستى تالاپ. سوندىقتان بۇل سالادا رەتتەۋدى قاجەت ەتەتىن ماسەلەلەر بار. 200 وقۋشى – بۇل 8 سىنىپ جيىنتىعى. ەگەر مەكتەپ 1-سىنىپتان 11-سىنىپقا دەيىن جۇمىس ىستەسە، «وقۋشى كونتينگەنتى تولىق پا؟» دەگەن سۇراق تۋىندايدى. جالپى، ءقازىر جەكەمەنشىك مەكتەپتەرگە قاتىستى ماسەلەلەر كەشەندى تۇردە قاراستىرىلىپ جاتىر، – دەدى عاني بەيسەمبايەۆ.