دەپۋتات باقىتجان بازاربەك مينيسترلىكتەر مەن مەملەكەتتىك اپپاراتتى قىسقارتۋدى ۇسىندى

ءماجىلىس دەپۋتاتى باقىتجان بازاربەك مەملەكەتتىك باسقارۋ جۇيەسىنە جاساندى ينتەللەكتىنى ەنگىزۋدى جانە مەملەكەتتىك شىعىنداردى وڭتايلاندىرۋ ماقساتىندا مينيسترلىكتەردى قىسقارتۋدى ۇسىندى. بۇل تۋرالى ول ءماجىلىس كۋلۋارىندا مالىمدەدى.

— مەملەكەتتىك قىزمەتتى سيفرلاندىرۋ اياسىندا ءبىز 2026 جىلدان باستاپ مەملەكەتتىك اپپاراتتى كەزەڭ-كەزەڭىمەن قىسقارتۋعا كوشۋىمىز كەرەك. ءبىراق بۇل قادامنان ۇكىمەت تە، باسقا قۇرىلىمدار دا قورقادى. ەگەر 2026 جىلدان باستاپ شىعىنداردى ازايتپاساق، مەملەكەتىمىز قارىز قىسىمىندا قالۋى مۇمكىن، — دەدى دەپۋتات.

ونىڭ ايتۋىنشا، مەملەكەتتىك قارىزدى ازايتۋ ءۇشىن كەيبىر ۇلتتىق كومپانيالار مەن مينيسترلىكتەردىڭ قۇرىلىمدارىن وڭتايلاندىرۋ قاجەت.

— «سامۇرىق-قازىنا»، «بايتەرەك» سياقتى ۇلتتىق كومپانيالاردىڭ اكىمشىلىك اپپاراتىن قىسقارتۋ كەرەك. سونداي-اق، كەيبىر مينيسترلىكتەردى بىرىكتىرۋ ۇسىنىلادى. مىسالى، سۋ رەسۋرستارى جانە ەكولوگيا مينيسترلىگىن، قارجى جانە ۇلتتىق ەكونوميكا مينيسترلىگىن، يندۋستريا جانە ونەركاسىپ-قۇرىلىس مينيسترلىگىن قوسۋعا بولادى. ءار مينيسترلىكتە كەمىندە 5-6 ۆيسە-مينيستر بار. ولاردىڭ سانىن ەكىگە دەيىن قىسقارتۋعا بولادى. بۇل مەملەكەتتىك شىعىنداردى ازايتۋعا ىقپال ەتەدى، — دەپ اتاپ ءوتتى بازاربەك.

دەپۋتاتتىڭ پىكىرىنشە، جاساندى ينتەللەكتىنى مەملەكەتتىك ورگاندار جۇمىسىنا ەنگىزۋ ارقىلى دا ۇدەرىستى جەدەلدەتۋگە جانە تيىمدىلىككە قول جەتكىزۋگە بولادى.