ق ر پرەزيدەنتى قاسىم-جومارت توقايەۆتىڭ تاپسىرماسىن ىسكە اسىرۋ اياسىندا ۇكىمەت رەزەرۆىنەن شىعىس قازاقستان وبلىسىنداعى توزىعى جەتكەن جىلۋ جەلىلەرىن جوندەۋ جانە قالپىنا كەلتىرۋ جۇمىستارىنا 2،5 ملرد تەڭگەدەن استام قارجى ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى. قاراجات ريددەر قالاسى مەن ق. قايسەنوۆ كەنتىندەگى ەڭ وزەكتى جىلۋ جەلىلەرىن جوندەۋگە باعىتتالادى.

بولىنگەن سومانىڭ باسىم بولىگى ريددەر قالاسىنداعى ەڭ قاتتى توزعان 5،9 شاقىرىمدىق جىلۋ جەلىلەرىن كۇردەلى جوندەۋگە جۇمسالماق. ال ق. قايسەنوۆ كەنتىندە ۇزىندىعى 9 شاقىرىم بولاتىن جەلىلەردى جاڭعىرتۋدىڭ ەكىنشى كەزەڭىن اياقتاۋعا 113 ملن تەڭگە قاراستىرىلعان.

شىعىس قازاقستان وبلىسىنداعى ەلدى مەكەندەردىڭ جىلۋ ينفراقۇرىلىمى 30 جىلدان استام ۋاقىت بويى پايدالانىلىپ كەلەدى جانە وسى ارالىقتا كۇردەلى جوندەۋ كورمەگەن. قازىرگى تاڭدا وبلىستاعى جىلۋ جەلىلەرىنىڭ ورتاشا توزۋ دەڭگەيى 55 پايىزدان اسسا، كەيبىر ەلدى مەكەندەردە بۇل كورسەتكىش 75 پايىزدان جوعارى.

بۇعان دەيىن، 2024 جىلدىڭ مامىر ايىندا ۇكىمەت رەزەرۆىنەن شامامەن 1،7 ملرد تەڭگە ءبولىنىپ، ريددەر جىلۋ ەلەكتر ورتالىعىنداعى ەكى قازاندىق اگرەگاتىن جوندەۋگە، №5 رەدۋكسيالىق-سالقىنداتۋ قوندىرعىسىنا اۆتوماتتاندىرىلعان باسقارۋ جۇيەسىن ەنگىزۋگە جانە ەلەكتروتەحنيكالىق جابدىقتىڭ ءبىر بولىگىن اۋىستىرۋعا باعىتتالعان بولاتىن.

سوڭعى ەكى جىلدا قالادا جوندەۋ جۇمىستارى توتەنشە جاعدايدا جۇرگىزىلىپ، جەو-نى ىسكە قوسۋ جانە جىلۋ جەلىلەرىن قالپىنا كەلتىرۋ بويىنشا جەدەل شارالار قابىلداندى. سونىڭ ناتيجەسىندە ريددەردەگى جىلۋ جەلىلەرىنىڭ توزۋ دەڭگەيى 82 پايىزدان 66،8 پايىزعا دەيىن تومەندەدى.