بۇگىن تاڭەرتەڭ ازەربايجاننىڭ ىشكى ىستەر مينيسترلىگى باكۋ قالاسىنداعى «Sputnik ازەربايجان» اگەنتتىگىنىڭ كەڭسەسىندە ارنايى وپەراسيا جۇرگىزىپ، بىرنەشە ادامدى ۇستادى. اپا اگەنتتىگىنىڭ مالىمەتىنشە، ۇستالعانداردىڭ قاتارىندا رەسەي فەدەرالدىق قاۋىپسىزدىك قىزمەتىنىڭ (فسب) ەكى وكىلى بار. ولار وسى ۋاقىتقا دەيىن اتالعان اقپارات قۇرالىندا جۇمىس ىستەگەن.
«Sputnik ازەربايجان» — رەسەيدىڭ «روسسيا سەگودنيا» حالىقارالىق مەديا اگەنتتىگىنىڭ باكۋدەگى بولىمشەسى. 2024 جىلدىڭ اقپان ايىندا ازەربايجان بيلىگى اگەنتتىك قىزمەتىن ۋاقىتشا توقتاتۋ تۋرالى شەشىم قابىلداعان ەدى. بۇل شەشىم شەتەلدىك باق-تىڭ ەل اۋماعىنداعى جۇمىسىن رەتتەۋ جانە ءوزارا اقپارات الماسۋ تەڭدىگىن ساقتاۋ ماقساتىندا قابىلدانعان.
رەسمي تالاپ بويىنشا، باكۋدە جۇمىس ىستەيتىن «Sputnik» ءجۋرناليسىنىڭ سانى رەسەيدەگى ازەربايجاندىق «ازەرتادج» اگەنتتىگىنىڭ تىلشىلەرىمەن تەڭ بولۋى ءتيىس بولعان. الايدا «Sputnik ازەربايجان» بۇل شارتتى ورىنداماي، قىزمەتىن جالعاستىرعان.
ءقازىر تەرگەۋ امالدارى جۇرگىزىلۋدە.
