اباي قۇنانباي ۇلىنىڭ 180 جىلدىق مەرەيتويى ون كۇن بويى تويلاندى. اباي وبلىسىندا ارنايى كيىز ۇيلەر قالاشىعى سالىنىپ، مەملەكەت جانە قوعام قايراتكەرلەرى، ادەبيەت پەن مادەنيەت مايتالماندارى، اقساقالدار اباي تۋعان ايماققا اتتاندى.
توي تارقاعان سوڭ الەۋمەتتىك جەلىلەردە قازاقستان رەسپۋبليكاسى پارلامەنتى سەناتىنىڭ ءتوراعاسى ماۋلەن اشىمبايەۆ پەن اباي وبلىسىنىڭ اكىمى بەرىك ءۋاليدى «ەرىكتى جاستار ارنايى شەڭبەر قۇرىپ قورشاپ ءجۇردى» دەگەن جازبالار تارادى. جۇرتشىلىقتىڭ پىكىرى ەكىگە جارىلعان سوڭ بۇگىن ق ر پارلامەنتى سەناتىنىڭ باسپا ءسوز قىزمەتىنىڭ جەتەكشىسى دانيار رامازانوۆ ءمان-جايدى تارقاتىپ، ارنايى جازبا جۇكتەدى ءوز پاراقشاسىنا.
وقىرمانعا تۇسىنىكتى بولۋى ءۇشىن تومەندە اتالعان رەسمي ءارى ناقتى جاۋاپتىڭ تولىق ءماتىنى مەن سىلتەمەسىن قوسا جۇكتەپ وتىرمىز:
«سوڭعى كۇندەردە الەۋمەتتىك جەلىلەردە اباي تويىنا بارعان سەنات ءتوراعاسى، اباي وبلىسىنىڭ اكىمى، مينيسترلەر جانە سالتاناتتى ءىس-شاراعا كەلگەن باسقا دا دەلەگاتتاردىڭ «قاۋىپسىزدىك شەڭبەرىمەن» قورشالىپ جۇرگەنى تۋرالى اقپارات تاراعانى بەلگىلى.
وسى ماسەلەگە بايلانىستى اباي وبلىسىنىڭ اكىمدىگى، اكىم بەرىك ءۋالي، سونداي-اق، كەشە مينيستر ساياسات نۇربەك تۇسىنىكتەمە بەردى. راسىمەن، مۇنداي ارەكەتتىڭ مۇلدەم ورىنسىز ەكەنىنە ەشقانداي كۇمان جوق. ءبىز اتالعان جايتتى كورگەن بويدا ەرىكتىلەردەن ونى دوعارىپ، باسقا، ماڭىزدى ىستەرمەن اينالىسۋىن سۇرادىق. وسىلايشا، بۇل جاعداي وتە قىسقا ۋاقىتقا عانا جالعاستى.
ال، قالعان ۋاقىتتا ءبىز كيىز ۇيلەر قالاشىعىندا ەركىن ءجۇرىپ-تۇردىق. مەرەكەگە كەلگەن كەز كەلگەن ادام سەنات توراعاسىمەن كەزدەسىپ، امانداسىپ، پىكىرلەسكەنىن وسى ۆيدەودان-اق انىق كورۋگە بولادى. ۇزاق ءتۇسىندىرىپ جاتقاننان گورى، ءبىر رەت كورسەتىپ، ماسەلەنى وسى جەردەن جاپقان دۇرىس دەپ ويلايمىن.
وكىنىشكە قاراي، كەيبىر جەلى قولدانۋشىلارى ون كۇن بويى اتالىپ وتكەن ءدۇبىرلى تويدى جالعىز وسى كەلەڭسىزدىكپەن بايلانىستىرىپ، «جەردەن جەتى قويان تاپقانداي» جارىسا جازىپ جاتىر. ال، ءبىز ويشىل وسيەت ەتكەندەي، قالپىمىز بەن سانامىزدى تازا ۇستاساق، جارقىن ساتتەرگە كوبىرەك ءمان بەرسەك، وسى ءبىر ۇلاعاتتى ىستەن ونەگە الساق دەيمىز.
P.S. جالپى، باسپا ءسوز حاتشىسى رەتىندە، باسقا-باسقا، ءدال سەنات ءتوراعاسىنىڭ حالىقپەن سۇحبات قۇرۋعا، قويىلعان سۇراقتارعا جاۋاپ بەرۋگە، ايتىلعان پىكىردى تىڭداۋعا ءاردايىم اشىق ەكەنىن اتاپ وتكىم كەلەدى. بۇل رەتتە ول ەشقاشان ەشكىمنەن جالتارىپ كورگەن ەمەس. ونى ماۋلەن ساعاتحانۇلىمەن اپتا سايىن كەزدەسىپ، ساۋالدارىنا جاۋاپ الىپ جۋرناليستەر قاۋىمى جاقسى بىلەدى».
جازباعا تىكەلەي سىلتەمە
