قاسىم-جومارت توقايەۆ جاڭا پارلامەنت قۇرۋعا قاتىستى پىكىر ءبىلدىردى. پرەزيدەنتتىڭ ايتۋىنشا، پارلامەنتتىك رەسپۋبليكا قۇرۋ كۇن تارتىبىندە تۇرعان جوق. بۇل تۋرالى ول «بەيبىتشىلىك پەن قۇقىققا نەگىزدەلگەن بولاشاق» اتتى كونستيتۋسيالىق سوت تورەلىگىنىڭ حالىقارالىق فورۋمىندا ايتتى.
– جولداۋدا ءبىزدىڭ جاڭعىرۋعا، يننوۆاسياعا، ورنىقتى دامۋعا، عالامدىق كۇن تارتىبىندەگى قازاقستاننىڭ بەدەلىن نىعايتۋعا، حالىقارالىق ىنتىماقتاستىقتىڭ جاڭا مۇمكىندىكتەرىن ىلگەرىلەتۋگە قاتىستى ۇستانىمىمىز كورىنىس تاپتى. شەتەلدىك سەرىكتەستەرىمىزدىڭ وسى باسىمدىقتاردى ايقىن تۇسىنگەنى وتە ماڭىزدى دەپ سانايمىن. باستى ماقسات – قازاقستاندى تەحنولوگيالىق تۇرعىدان وزىق ەلگە اينالدىرۋ. سوندىقتان جاساندى ينتەللەكتىنىڭ قولدانۋ اياسىن كەڭەيتۋ جانە جاپپاي سيفرلاندىرۋ جاڭا ۇلتتىق يدەياعا اينالادى، – دەدى قاسىم-جومارت توقايەۆ.
بۇدان بولەك، پرەزيدەنت پارلامەنت جۇيەسىندە الداعى ۋاقىتتا بولاتىن وزگەرىستەرگە توقتالدى.
– اشىعىن ايتقاندا، بۇل رەفورما ساياسي جۇيەمىزدىڭ ينستيتۋسيونالدى بازاسىن نىعايتۋدى كوزدەيدى. پارلامەنتتىك رەسپۋبليكاعا اينالۋ ماسەلەسى كۇن تارتىبىندە تۇرعان جوق. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتى ساقتالادى. جالپىۇلتتىق رەفەرەندۋم وتكىزۋ تۋرالى ۇسىنىس بۇل تۇجىرىمدامانىڭ ومىرشەڭدىگىن كورسەتەدى. ەلىمىزدىڭ بولاشاعىنا قاتىستى شەشىمدەردى بىرلەسىپ قابىلداۋ قاجەت. سول سەبەپتى مەن ساياسي جوسپارلارىمىز تۋرالى الدىن الا ايتامىن. بۇعان دەيىنگى رەفورمالار كەزىندە دە، اەس قۇرىلىسىنا قاتىستى رەفەرەندۋم وتكىزگەندە دە وسى ۇستانىمنان اينىعان جوقپىز، – دەدى پرەزيدەنت.
