پرەزيدەنت قاسىم-جومارت توقايەۆ بۇۇ باس اسسامبلەياسى 80ء-شى سەسسياسىنىڭ جالپى دەباتىندا عازاداعى جاعدايعا قاتىستى پىكىر ءبىلدىردى. پرەزيدەنت داۋدى ۋشىقتىرعاننان گورى ديپلوماتياعا جۇگىنۋدى ءجون دەپ سانايتىنىن ايتتى.
"قازاقستان بەيبىت تۇرعىندارعا وراسان زور زالال كەلتىرىپ، جاھاندىق سەنىمگە سەلكەۋ تۇسىرگەن جانە حالىقارالىق قاۋىپسىزدىكتى السىرەتكەن ۋكراينا اينالاسىنداعى داعدارىسقا الاڭداۋلى. دەگەنمەن اتالعان قاقتىعىستى توقتاتۋ ءۇشىن ەكىجاقتى جانە حالىقارالىق دەڭگەيدەگى ديپلوماتيالىق كۇش-جىگەردى جالعاستىرىپ، قوس مەملەكەت ۇزاق مەرزىمدى مۇددەلەرىنە ساي كەلەتىن ساياسي يكەمدىلىك كورسەتۋى كەرەك"، دەدى توقايەۆ.
سونداي-اق مەملەكەت باسشىسى گازاداعى گۋمانيتارلىق داعدارىسقا بەي-جاي قاراۋعا بولمايتىنىن ايتتى.
"گازاداعى گۋمانيتارلىق داعدارىستىڭ اۋقىمى ءتىپتى قورقىنىشتى. وعان بەي-جاي قاراۋ مۇمكىن ەمەس. بۇل قاقتىعىستىڭ تاريحي تامىرى تىم كۇردەلى. ءبىز وسى جاۋلاسۋدىڭ تۇپكى سەبەبىن ەسكەرۋسىز قالدىرا المايمىز. قازاقستان اسكەري ءىس-قيمىلدى دەرەۋ توقتاتۋعا، بەيبىت تۇرعىنداردى تولىق قورعاۋعا جانە حالىقارالىق گۋمانيتارلىق قۇقىق اياسىنداعى كومەكتىڭ كەدەرگىسىز جەتۋىن قامتاماسىز ەتۋگە شاقىرادى"، دەدى پرەزيدەنت.
