فەيسبۋك الەۋمەتتىك جەلىسىندە جۋرناليست ميربولات مىرزاتاي ۇلىنىڭ تۇرمەدەن جازعان حاتى جاريالاندى. حاتىندا جۋرناليست جازىقسىز جالا جابىلعانىن جازعان. 

«ارمىسىزدار، اعايىن! ماعان تاعىلعان ءتىل توڭىرەگىندەگى ايىپ - «جاپتىم جالا، جاكتىم كۇيە» نەگىزىندە كۇراستىرىلعان دەپ ويلايمىن. ويتكەنى ءىد الەۋمەتتىك جەلىنى سارالاعان بولىپ، اياقاستى كۇراستىرىلعان ءىس ەكەنى ايدان انىق كورىنىپ تۇر.

ولاردىڭ پايىمداۋىنشا، «قازاقشا سويلەۋ قىلمىس بولسا»، مەن-اق قىلمىسكەر بولايىن...
«جۋرناليستىك زەرتتەۋلەر اگەنتتىگىنىڭ» جۇمىسى اناسىن ساتقان، جەرىن ساتقان وپاسىزدارعا ۇناماي قالسا كەرەك. نەگىزىندە ولاردىڭ شىرىك ارەكەتتەرىنىڭ استارىندا ءسوز بوستاندىعىن تۇنشىقتىرۋ جاتىر.

انا ءتىلىمىزدى قولداپ، جەر-انامىزدى قورعاپ تۇرمەگە قامالۋ - تۇسىنگەن ادامعا ۇلكەن ابىروي. زامانىندا الاش ارىستارىمىز ءوز ومىرلەرىن وسى جولدا قۇربان ەتتى عوي. 1986 جىلى جەلتوقساندا كوتەرىلگەن جاستارىمىز دا سول ءۇشىن جان بەرىپ، جان الىستى.

كەشەگى قاڭتاردا دا تالاي ادام ءومىرىن قيدى. نە ءۇشىن؟ مۇنداي جانقيارلىقتا بولاشاق ۇرپاق ءوز جەرىڭدە، ءوز تىلىندە ەمىن-ەركىن سويلەپ، باي-قۋاتتى بولسا دەگەن ءبىر عانا كاعيدا بار سياقتى ماعان. سوندىقتان سىن ساعاتتا مەنى قولداپ كەلگەن بارلىق جەلتوقساندىقتار مەن حالىق بەلسەندىلەرىنە ايتار العىسىم شەكسىز. كۇش - بىرلىكتە!»، دەپ جازدى ميربولات مىرزاتاي ۇلى ءوزىنىڭ حاتىندا. 

بۇعان دەيىن ميربولات مىرزاتاي ۇلىنىڭ 2 ايعا قامالعانى حابارلانعان. وعان قىلمىستىق كودەكستىڭ 174-بابى، ءبىرىنشى بولىگى بويىنشا (الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ) ايىپ تاعىلعان.