ەرمەك كوشەربايەۆ سىرتقى ىستەر ءمينيسترى بولىپ تاعايىندالدى، دەپ حابارلايدى اقوردا. 

"مەملەكەت باسشىسىنىڭ جارلىعىمەن ەرمەك بەدەلباي ۇلى كوشەربايەۆ قازاقستان رەسپۋبليكاسىنىڭ سىرتقى ىستەر ءمينيسترى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى"، – دەلىنگەن حابارلامادا.  

ايتا كەتەيىك، ەرمەك كوشەربايەۆ 1965 جىلى 2 مامىردا الماتىدا دۇنيەگە كەلگەن. ول 1988 جىلى قيروۆ اتىنداعى قازاق مەملەكەتتىك ۋنيۆەرسيتەتىن تاريحشى ماماندىعى بويىنشا، كەيىن 1993 جىلى كسرو سىرتقى ىستەر مينيسترلىگىنىڭ ديپلوماتيالىق اكادەمياسىن حالىقارالىق قاتىناستار جانە سىرتقى ساياسات ماماندىعى بويىنشا ءتامامداعان.

ەڭبەك جولىن سىرتقى ىستەر مينيسترلىگىندە باستاپ، كەيىن قازاقستان پرەزيدەنتى اكىمشىلىگى، ەلشىلىك، پرەمەر-مينيستر اپپاراتى، ءىرى مەملەكەتتىك جانە جەكە كومپانيالار، سونداي-اق ءتۇرلى قوعامدىق جانە ساياسي ۇيىمداردا قىزمەت اتقارعان.

ول قازاقستانداعى ءىرى مەملەكەتتىك كومپانيالاردا جانە ساياسي ۇيىمداردا باسشىلىق قىزمەتتەردى، سونداي-اق وبلىس اكىمىنىڭ ورىنباسارى مەن ءبىرىنشى ورىنباسارى، ۆيسە-مينيستر، مينيسترلىكتەردىڭ جاۋاپتى حاتشىسى، قازاقستاننىڭ رەسەي فەدەراسياسىنداعى توتەنشە جانە وكىلەتتى ەلشىسى، سونداي-اق شىعىس-قازاقستان وبلىسىنىڭ اكىمى لاۋازىمدارىن اتقارعان.

2025 جىلعى 14 اقپاننان باستاپ قازاقستان رەسپۋبليكاسىنىڭ پرەمەر-مينيسترىنىڭ ورىنباسارى قىزمەتىن اتقارىپ كەلەدى. ول قازاق، ورىس، اعىلشىن، نەمىس جانە كورەي تىلدەرىن مەڭگەرگەن.