الماتىلىق پوليسيا قىزمەتكەرلەرى ەسىرتكى تاسىمالداۋعا بايلانىستى بىرنەشە قىلمىستىڭ بەتىن اشتى. قىركۇيەك ايىندا بۇعان قاتىستى بىرنەشە جاعداي تىركەلدى. 

5 قىركۇيەكتە الماتى قالاسىندا 13 توننا 183 كيلوگرامم كوكاين تابىلدى. بۇل – رەكوردتىق كورسەتكىش. ارنايى قىزمەتتەردىڭ مالىمەتىنشە، پارتيا ىشكى نارىققا ارنالماعان: ەسىرتكى قازاقستان ارقىلى باسقا مەملەكەتتەرگە ترانزيتپەن ءوتۋى ءتيىس ەدى.

تەرگەۋ بارىسىندا وسى باعىتتى ۇيىمداستىردى دەپ كۇدىكتەلگەن ەكى شەتەلدىك ۇستالدى. ولار قاماۋعا الىندى، ءىس ق ر قىلمىستىق كودەكسىنىڭ 297-بابى، 3-بولىگى بويىنشا قارالۋدا.

11 قىركۇيەكتە پوليسيا الماتىدا پسيحوتروپتىق زاتتاردى جەتكىزۋ ارناسىنىڭ جولىن كەستى.

"قاراسورا-2025" جەدەل الدىن الۋ ءىس-شاراسى اياسىندا الماتى پد ەسىرتكى قىلمىسىنا قارسى ءىس-قيمىل بولىمشەسىنىڭ قىزمەتكەرلەرى "قازپوشتا" وكىلدەرىمەن بىرلەسىپ پسيحوتروپتىق زاتتاردىڭ ءىرى پارتياسىن الۋشىنى ۇستادى.

وپەراسيا بارىسىندا پوشتا سالەمدەمەسى رەتىندە جاسىرىلعان كۇشتى پرەپاراتتىڭ 300-گە جۋىق تابلەتكاسى تاركىلەندى. الدىن الا مالىمەتتەر بويىنشا، پرەپارات شەتەلگە جىبەرۋگە ارنالعان. الۋشى-31 جاستاعى جەرگىلىكتى تۇرعىن. پد اتاپ وتكەندەي، ۇستالعان ادامعا قاتىستى سوتقا دەيىنگى تەرگەۋ جۇرگىزىلەدى، ونىڭ باسقا ەپيزودتارعا قاتىسۋى تەكسەرىلەدى.

ەسىرتكى تاسىمالداۋشىلار اراسىندا قابىرعا بوياۋشىلاردىڭ دا ءوز مىندەتتەرى بار. ولار ەسىرتكى قويىلعان جەرگە بەلگى قالدىرۋ ءۇشىن قابىرعالارعا بەلگى قالدىرادى.

وسىعان قاتىستى الماتى پوليسەيلەرى قورشاۋلار مەن قابىرعالارعا ەسىرتكى سايتتارىن جارنامالايتىن 30-دان استام گراففيتي سالعان ادامدى ۇستادى.

كۇدىكتىنى تۇركسىب اۋدانىنىڭ پوليسيا قىزمەتكەرلەرى بەينەباقىلاۋ كامەرالارىنداعى جازبالار ارقىلى انىقتادى.

ەسىرتكىنى، پسيحوتروپتىق زاتتاردى نەمەسە ولاردىڭ انالوگتارىن، پرەكۋرسورلاردى ناسيحاتتاۋ نەمەسە زاڭسىز جارنامالاۋ فاكتىسى بويىنشا پوليسيا قىلمىستىق ءىس قوزعادى.

الماتىلىق پوليسيا ءۇشىن ەسىرتكىمەن كۇرەس جالعاسىپ جاتىر. ولار قىلمىستىق ىستەردى اشۋمەن قاتار، جاستار اراسىندا اقپاراتتىق-ناسيحات جۇمىستارىن جۇرگىزىپ جاتىر.