رەسەي–ۋكراينا سوعىسىن توقتاتۋعا باعىتتالعان بەيبىت كەلىسىم جوباسى قىزۋ تالقىلانىپ جاتىر. سوڭعى مالىمەتتەر بويىنشا:

وتكەن اپتادا ترامپ اكىمشىلىگى قولداعان 28 تارماقتان تۇراتىن جوسپار ۋكراينا مەن ەۋروپا وداعىنداعى وداقتاستار تاراپىنان سىنعا ۇشىراعان. سەبەبى قۇجات رەسەيدىڭ پايداسىنا جاسالعان دەپ باعالانعان.

كەيىن جوسپار قايتا وڭدەلدى، الايدا جاڭارتىلعان نۇسقانىڭ ءماتىنى ازىرگە جاريالانعان جوق.

ۋكراينا پرەزيدەنتى ۆلاديمير زەلەنسكيي جاڭا جوبا بويىنشا «ءبىرقاتار سەزىمتال ماسەلەلەر» ەسكەرىلسە، كەلىسسوزدەردى جالعاستىرۋعا دايىن ەكەنىن مالىمدەدى.

ال اقش پرەزيدەنتى دونالد ترامپ ارنايى وكىلى ستيۆ ۋيتكوفتى رەسەي پرەزيدەنتى ۆلاديمير پۋتينمەن كەلىسسوزدەر جۇرگىزۋ ءۇشىن ماسكەۋگە جىبەرىپ، «كەلىسىمگە جاقىنداپ قالدىق» دەپ وتىر.

جاڭا جوسپاردىڭ مازمۇنى تۋرالى تولىق اقپارات جوق، ءبىراق كەيبىر ماڭىزدى تۇستار وزگەرگەنى بەلگىلى. سوڭعى اقپاراتتارعا سايكەس، قۇجاتتا ۋكراين اسكەرىن دونباسستان شىعارۋ تالابى جوق. سونىمەن قاتار جوبا بويىنشا ۋكراينانىڭ ناتو-عا قوسىلۋىنا جانە ءوز ارمياسىن ساقتاۋىنا رۇقسات بەرىلەدى. ال، بۇعان دەيىن زەلەنسكيي  ۋكراينانىڭ اۋماقتارىن رەسەيگە بەرمەيتىنىن ەسكەرتكەن.