الماتىدا «انا، اكە جانە مەن – سپورتتى جاقسى كورەتىن وتباسى» دەگەن ۇران قايتا جاڭعىردى. المالى اۋدانىنداعى ءبىر اۋلانىڭ تۇرعىندارى ءۇشىن اۋدان اكىمدىگى مەن iConic Creative School، سونداي-اق قالالىق سپورت باسقارماسى بىرلەسىپ «كوڭىلدى جارىستار» اتتى وتباسىلىق سايىستار ۇيىمداستىردى.
تۋرنير باعدارلاماسىنا تۋرنيككە تارتىلۋ، باسكەتبول ساقيناسىنا دالدەپ لاقتىرۋ، قول كۇرەس، ارقان تارتۋ، وتباسىلىق ەستافەتا جانە بي سايىسى كىردى. جەڭىمپازدار مەن جۇلدەگەرلەرگە باعالى سىيلىقتار، سونداي-اق iConic مەكتەبىنىڭ قىزمەتىنە 10 جانە 20 مىڭ تەڭگەلىك سەرتيفيكات تابىستالدى.
ۇيىمداستىرۋشىلار اتا-انالاردى بالالار ءۇشىن شابىت بەرۋشى ءارى ۇلگى بولۋعا شاقىردى. انالار مەن اكەلەر جارىسقا ەرەكشە قۇلشىنىسپەن قاتىسىپ، ال جاس الماتىلىقتار ۇزدىك اتانۋ ءۇشىن بارىن سالدى.
نەمەرەسى اديامەن كەلگەن تىلەۋباي جۇماجانوۆ ءىس-شاراعا ريزاشىلىق ءبىلدىرىپ:
«بالالاردىڭ قۇلشىنىسپەن جارىسىپ جۇرگەنىن تاماشالاۋ – ۇلكەن قۋانىش. المالى اۋدانىنىڭ باستاماسى جالعاسىن تاۋىپ، بولاشاقتا كەڭ قولداۋ كورسە ەكەن»، — دەدى.
iConic مەكتەبىنىڭ باسشىسى رومان ميرونوۆ بارلىق تۇرعىن جارىسقا ەركىن قاتىسا الاتىنىن ايتىپ، باستى ماقسات – بالالاردى بەلسەندى دەمالىسقا باۋلۋ ەكەنىن اتاپ ءوتتى:
«جىلدىڭ سوڭعى جىلى كۇندەرىن ءتيىمدى پايدالانىپ، بالالارعا سپورتتىق قىزىق ويىنداردىڭ ينتەرنەتتەگىدەن الدەقايدا قىزىقتى ەكەنىن كورسەتكىمىز كەلەدى. كوپشىلىگى كومپيۋتەرلىك ءتۋرنيردى ءجون كورەدى، ءبىراق قارسىلاسىڭدى كوزبە-كوز كورىپ، ءادىل جارىستا جەڭىسكە جەتۋدىڭ اسەرى مۇلدە بولەك. بالالار مەن اتا-انالاردىڭ شىنايى قۋانىشىن كورىپ، ءوزىم دە سەرگىپ قالدىم.
بۇل باستاما قولداۋ تاۋىپ، جىل مەزگىلىنە قاراماستان وتباسىلىق جارىستار الماتىنىڭ بارلىق اۋلاسىندا وتكىزىلىپ تۇرسا ەكەن. مۇنداي ءداستۇر سۇيىكتى قالامىزدىڭ وزىندىك ەرەكشەلىكتەرىنىڭ بىرىنە اينالۋى مۇمكىن».
مۇنداي اۋلاداعى باستامالار الماتىنىڭ «انا، اكە جانە مەن – سپورتتىق وتباسى» دەگەن رۋحتى مەگاپوليستىڭ جاڭا جاعدايىندا دا ساقتاپ كەلە جاتقانىن كورسەتەدى. اۋلاداعى كەزدەسۋلەر كورشىلەردى، اتا-انالار مەن بالالاردى بىرىكتىرىپ، ءبىر جاعادان باس، ءبىر جەڭنەن قول شىعارىپ، دەنساۋلىقتى نىعايتۋعا، دوستىقتى ارتتىرۋعا جانە قالاعا دەگەن سۇيىسپەنشىلىكتى بەكەمدەۋگە مۇمكىندىك بەرەدى.
