گەرمانيا ەكىنشى دۇنيەجۇزىلىك سوعىستان بەرى العاش رەت ءوز ارمياسىن ەۋروپاداعى ەڭ مىقتى كۇشكە اينالدىرۋدى اشىق ماقسات ەتىپ وتىر. 2026 جىلدىڭ باسىنان باستاپ 18 جاسقا تولعان نەمىس ازاماتتارىنا اسكەري قىزمەتكە جارامدىلىعىن انىقتايتىن مىندەتتى ساۋالناما جىبەرىلە باستادى. قازىرگى تاڭدا اسكەرگە بارۋ ەرىكتى بولعانىمەن، قابىلدانعان زاڭ ۇكىمەتكە قاجەت جاعدايدا مىندەتتى قىزمەت ەنگىزۋگە مۇمكىندىك بەرەدى. بۇل قادام بەرليننىڭ قاۋىپسىزدىككە دەگەن كوزقاراسى تۇبەگەيلى وزگەرگەنىن كورسەتەدى.
رەسەيدىڭ ۋكرايناداعى سوعىسى گەرمانياداعى اسكەري ساياساتتىڭ باستى قوزعاۋشى كۇشىنە اينالدى. بيلىك 2026 جىلى قارۋلى كۇشتەردى جاڭعىرتۋعا 108 ملرد ەۋرو ءبولۋدى جوسپارلاپ وتىر، بۇل ەلدىڭ ءجىو-نىڭ شامامەن 2،5 پايىزى. 2030 جىلعا قاراي بۇل كورسەتكىش 3،5 پايىزعا جەتۋى ءتيىس. قازىرگى تاڭدا Bundeswehr قاتارىندا 184 مىڭعا جۋىق اسكەري قىزمەتكەر بار، ال ناتو الدىنداعى مىندەت بويىنشا بۇل سان 2035 جىلعا قاراي 260 مىڭعا جەتكىزىلۋى كەرەك. سونىمەن قاتار رەزەرۆتەگى اسكەر سانى دا ەكى ەسە ۇلعايتىلادى.
ماڭىزدى بەتبۇرىس تەك قارجى مەن ادام رەسۋرستارىندا عانا ەمەس، تەحنولوگيالىق باعىتتا دا بايقالادى. گەرمانيا ۋكرايناداعى سوعىس تاجىريبەسىن ەسكەرە وتىرىپ، دروندار مەن ۇشقىشسىز جۇيەلەردى ءوز اۋماعىندا ءوندىرۋدى باستاپ كەتتى. بۇل ءوندىرىس تەك Bundeswehr قاجەتتىلىگى ءۇشىن ەمەس، سونىمەن قاتار ۋكرايناعا اسكەري-تەحنيكالىق قولداۋ كورسەتۋگە باعىتتالعان. بەرلين درون سوعىسىنىڭ قازىرگى قاقتىعىستارداعى شەشۋشى ءرولىن مويىنداپ، بارلاۋ، شابۋىل جانە ەلەكتروندى قارسى ءىس-قيمىل تەحنولوگيالارىنا باسىمدىق بەرىپ وتىر.
سونىمەن بىرگە گەرمانيا قوعامىندا اقش-قا دەگەن سەنىمنىڭ ايتارلىقتاي تومەندەۋى بايقالادى. سوڭعى ساۋالنامالارعا سايكەس، نەمىستەردىڭ باسىم بولىگى ۆاشينگتوننىڭ ەۋروپانىڭ قاۋىپسىزدىگىنە كەپىل بولا بەرەتىنىنە كۇمانمەن قارايدى. دونالد ترامپتىڭ ۇلتتىق قاۋىپسىزدىك ستراتەگياسىنداعى ەۋروپاعا قاتىستى قاتقىل ريتوريكاسى بۇل سەنىمسىزدىكتى كۇشەيتتى. ناتيجەسىندە گەرمانيادا ەۋروپالىق يادرولىق تەجەۋ تەتىگىن قۇرۋ جانە «ەۋروپالىق ناتو» يدەياسىنا قولداۋ ارتىپ كەلەدى.
ساراپشىلاردىڭ ايتۋىنشا، گەرمانيانىڭ اسكەري كۇشەيۋى ماسكەۋدى الاڭداتپاي قويمايدى. رەسەي تاراپى بەرليندى تىكەلەي قارسىلاسۋعا دايىندالىپ جاتىر دەپ ايىپتايدى. الايدا نەمىس بيلىگى ءۇشىن بۇل – اگرەسسياعا جاۋاپ ەمەس، ۇزاق جىلدار بويعى ستراتەگيالىق نەمقۇرايلىلىقتىڭ ورنىن تولتىرۋ. ۋكرايناداعى سوعىس گەرمانياعا ءبىر شىندىقتى ايقىن كورسەتتى: ەۋروپانىڭ قاۋىپسىزدىگى ەندى سىرتقى كۇشتەرگە عانا سەنىپ قالماۋى ءتيىس، ال ۋاقىتتى سوزۋ ستراتەگيالىق قاتەلىككە اينالۋى مۇمكىن.
