اق ءۇيدىڭ گرەنلاندياعا قاتىستى تاريفتىك قوقان-لوققىسىنان كەيىن الەمدىك نارىقتا التىن باعاسى ءبىر ۋنسيا ءۇشىن 4 800 دوللاردان اسىپ، تاريحي رەكورد ورناتتى. گەوساياسي تۇراقسىزدىق پەن ساۋدا سوعىسى ءقاۋپى ينۆەستورلاردى ءقاۋىپسىز اكتيۆتەرگە بەت بۇرعىزدى.

ساراپشىلاردىڭ ايتۋىنشا، 2025 جىلى رەكوردتىق ءوسىم كورسەتكەن التىن 2026 جىلعا دا جوعارى قارقىنمەن كىردى. لوندوننىڭ قۇيما مەتالدار قاۋىمداستىعى (LBMA) ساۋالناماسىنا قاتىسقان اناليتيكتەر باعا بيىل 5 000 دوللاردان جوعارى كوتەرىلۋى مۇمكىن دەپ بولجايدى. كەيبىر بولجامداردا التىن 7 000 دوللارعا دەيىن جەتۋى ىقتيمال ەكەنى ايتىلادى.

Goldman Sachs پەن وزگە ءىرى بانكتەر التىندى ەڭ سەنىمدى ينۆەستيسيا دەپ اتاپ وتىر. ولاردىڭ پىكىرىنشە، ورتالىق بانكتەردىڭ دوللاردان الشاقتاۋى، پايىزدىق مولشەرلەمەلەردىڭ تومەندەۋى جانە گەوساياسي شيەلەنىستەر التىنعا دەگەن سۇرانىستى الداعى ۋاقىتتا دا كۇشەيتەدى.