Reseı Qazaqstannan jalǵa alyp otyrǵan 500 myń gektardan astam jer ýchaskelerin qaıtarady jáne tólemdi 1 mln. 373 myń dollarǵa qysqartady, - dep habarlaıdy «Qamshy» portaly QazAqparatqa silteme jasap.

Bul týraly búgin Parlament Senatynyń jalpy otyrysynda QR Qorǵanys mınıstriniń orynbasary, general-leıtenant Oqas Saparov málimdegen.

Eske salaıyq, Parlament Senaty «1995 jylǵy 20 qańtardaǵy Qazaqstan Respýblıkasy men Reseı Federasıasy arasyndaǵy Reseı Federasıasy Qorǵanys mınıstrliginiń (obektileri men urys alańdary Qazaqstan Respýblıkasynyń aýmaǵynda ornalasqan) 929 Memlekettik ushý-synaq ortalyǵyn paıdalaný tártibi týraly kelisimge ózgerister men tolyqtyrýlar engizý týraly hattamany ratıfıkasıalaý týraly» QR Zańy qabyldanǵan bolatyn.

Hattamalarǵa 2015 jylǵy 16 sáýirde Máskeýde qol qoıylǵan. Mınıstr orynbasarynyń aıtýynsha, «Hattama boıynsha Atyraý jáne Batys Qazaqstan oblystarynyń aýmaǵyndaǵy jalpy alańy 500 myń gektardan astam polıgon ýchaskeleri jaldaýdan shyǵarylady. Aıta ketý kerek, Reseı tarapyna naqty qajetti ólshemdi anyqtaý men áskerı polıgondar alańyn qaıta qaraý týraly tapsyrmany Elbasy júktegen. Sonymen qatar, jalǵa alynyp otyrǵan jerdi qaıtarý týraly bastamany múddeli mınıstrlikter de, tıisti oblys ákimdikteri de kótergen bolatyn», dedi O. Saparov. Onyń aıtýynsha, jalǵa berilýden shyǵarylatyn ýchaskelerde paıdaly qazbalardy óndirý boıynsha jobalar iske asyrylady. Máselen, Atyraý oblysyndaǵy «Taısoıǵan» ýchaskesinde Ýaz jáne Qondybaı ken oryndarynda kómirsýtekti óńdeý, sondaı-aq Batys Qazaqstan oblysynyń «Jamantaý» ýchaskesinde qıyrshyq tasty óndirý jobalary júzege asyrylady.

Odan basqa, Atyraý oblysynyń Aqjar kentinde turǵyn qurylystardy tirkeý júrgiziledi. Osylaısha, hattamany ratıfıkasıalaý Qazaqstannyń ekonomıkalyq damýyna oń yqpal etetin bolady.