Múnhende ótip jatqan qaýipsizdik jónindegi konferensıada sóz alǵan RF premeri Dmıtrıı Medvedev NATO elderi men Reseı arasyndaǵy qarym-qatynastyń shıeleniskenin, jaǵdaıdyń qyrǵı-qabaq soǵys kezindeni ahýalǵa qaıta shegingenin aıtty, - dep habarlaıdy «Qamshy» portaly.

«Birtutas Eýropa aqyry bolmady, bizdiń ekonomıkalarymyz óte baıaý ósýde. Taıaý Shyǵys elderinde, Soltústik Afrıkada jaǵdaı ýshyqty. Mıgrasıalyq kollaps oryn alýda. Eýroodaq pen Reseı qarym-qatynasy buzyldy, Ýkraınada azamattyq soǵys bolýda», - degen D. Medvedev NATO men RF qarym-qatynasyna qatysty da oıyn bildirdi.

«Kún saıy bizdi birese NATO úshin, birese jeke Eýropa úshin, endi birde Amerıka, taǵy basqa elder úshin úlken qaýip dep jarıalap jatady. Orystar ıadrolyq soǵys bastaıtyny týraly qorqynyshty fılmder túsirilýde. Keıde men «Biz 2016 jylda júrmiz be, joq álde 1962 jyldamyz ba?» degen oıǵa qalamyn», - dedi ol.

Alaıda, Reseımen soǵysatyndaı NATO jyndy emes degen NATO Bas hatshysy Iens Stoltenbergtiń jaýaby Medvedevti mazaq qylǵandaı sóz boldy.

«Keıbireýler NATO Reseımen soǵysýǵa qushtar aıkezbe (lýnatık – red.) dep alańdaıdy. Men bul alańdaýshylyqty túsinemin, biraq onymen kelise almaımyn», - degen Iens Stoltenberg áskerı uıymnyń Máskeýmen konstrýktıvti dıalog júrgizýge qabyletti ekenin jetkizdi.

Germanıanyń syrtqy ister mınıstri Frank-Valter Shtaınmaıer de Suddeutsche Zeitung nemis gazetine qyrǵı-qabaq soǵystyń aýyly alys ekenin aıtqan.

«Biz múldem qyrǵı-qabaq soǵys jaǵdaıynda emespiz. Men onyń sózin biz qyrǵı-qabaq soǵysy kezeńine qaıta kelmeýge tyrysaıyq dep túsindim», - degen Germanıa syrtqy ister mınıstri.

Medvedevtiń bul baıandamasynan uqqanymyz, teke-tires qajytqan Reseı bıligi Eýropa men basqa da órkenıetti elderge bastapqy nıetinen aınyǵanyn, kıkiljińdi ymyralasa sheshýge múddeli ekenin emeýrinmen bildirgisi keletin sıaqty. Ol emeýrindi jáne orys basshysy ózi emes, osy ýaqytqa deıin jer-kókke kúlki bolyp bitken Syrtqy ister mınıstri Sergeı Lavrovtyń emes, álemdik qaýymdastyq aldynda saıasatker retinde áli de súıkimi sarqyla qoımaǵan Dmıtrıı Medvedevtiń aýzymen aıtqyzyp otyr.

Darhan Muqan