Qytaıdaǵy reıtıńi eń joǵary áleýmettik jeli wechat.com jelisinde alaıaqtyq áreketter jıilep ketken, - dep habarlady Qytaıdyń qoǵamdyq qaýipsizdik mınıstrliginiń Bas shtaby.

Vedomstvo taratqan shuǵyl habarlamada alaıaqtardyń belgili bir adamnyń atynan paraqsha ashyp, onyń jelidegi tanystarynan aqsha suraý, basqa da kómek suraý áreketteriniń jıilep jatqany aıtylady.

«Wechat qoldanýshylary sizdiń bas fotońyz ben qoldanǵan esimińizdi paıdalanyp dostaryńyzdan, tanystaryńyzdan aqsha suraýy múmkin. Sol sebepti jeli qoldanýshylary mundaı ótinishterge muqıat qaraǵany jón» delingen habarlamada.

Wechat mobıldi komýnıkasıalyq júıesi Qytaıda 2011 jyldan beri jumys isteıdi. 2013 jyly bul jeli qoldanýshylarynyń sany 300 mıllıonnan asqan. Olardyń 70 mıllıonnan astamy Qytaıdan syrtqary jerlerde turatyn qoldanýshylar eken.

Bul jeliniń basqa áleýmettik jelilerden aıyrmashylyǵy óz ishinde aqsha aýdarymdaryn júzege asyrýǵa múmkindik beredi. 2016 jyly Qytaı jańa jylyn atap ótý kezinde osy jelimen aýdarylǵan qarajat somasy 2015 jyly paypal qyzmeti arqyly jasalǵan aýdarymdardan asyp túsken.