Jol aqysyn tóleýden bas tartqan jolaýshylardan soqqy jep kózinen aırylǵan almatylyq avtobýs júrgizýshisi Almatyda jolaýshylar soqqyǵa jyqqannan keıin kózinen aıyrylǵan avtobýs júrgizýshisi Qaldybek Baıtanaýov «Almaty kólik holdıńi» kásipornynan 5 mıllıon teńge talap etti, - dep habarlaıdy «Qamshy» portaly KTK-ǵa silteme jasap.

Júrgizýshi «Ońaı» júıesin engizgen kompanıanyń kesirinen múgedek bolyp qaldym dep otyr.

«Ońaı» kompanıasynyń ústinen shaǵym túsiremin. Sol joly «Ońaı» tekserýshileri bolǵanda, kartasy joq adamdarǵa aıyppul salyp, avtobýstan shyǵaryp tastar edi. Endi maǵan qarjylaı kómek kórsetsin", - dedi Baıtanaýov.

Dárigerler júrgizýshiniń kórý múmkindigin tolyqtaı qalpyna keltirip bere almady. Endi ol otbasyn qalaı asyraımyn dep qınalyp otyr. «Bir kózim múlde kórmeıdi, ekinshisi sál ǵana kóredi. Ekinshi toptaǵy múgedek bolyp qaldym, endi eshkimge de keregim joq. Al men bolsam balalarymdy asyraýym kerek», - deıdi ol.

"Ońaı" júıesin engizýshi kásiporyn basshylyǵy bolsa aıyppul tóleý negizsiz dep otyr. Olardyń aıtýynsha jábir kórgen júrgizýshi jeke avtopark qyzmetkeri. Sondyqtan da olar qandaı da bir ótemaqy tóleýdiń de reti joq dep esepteıdi.

«Biz tek óz qyzmetkerlerimizge jaýaptymyz. Eger olar jábirlense, qoldan kelgen kómektiń bárin jasar edik. Al bul jaǵdaıda taıaq jegen bizdiń jumysshy emes. Sondyqtan, biz kómek kórsetýge mindetti emespiz», - deıdi "Almaty kólik holdıńi" JSHS baspasóz hatshysy Elmıra Kırgeeva.

Esterińizge salsaq, oqıǵa 8 aqpan kúni Almatydaǵy Abdýllın jáne Qazybek bı kósheleriniń qıylysynda bolǵan. Belgisiz eki jolaýshy №13 baǵyttaǵy qoǵamdyq kóliktiń júrgizýshisin soqqyǵa jyqqan bolatyn.