Elbasy Nursultan Nazarbaev búgin Almaty qalasynda qalany damytý jáne Dúnıejúzilik 28-qysqy Ýnıversıadaǵa daıyndyq máseleleri jónindegi jıyn barysynda osylaı dep málimdedi. Bul týraly «Qamshy» portaly habarlaıdy.

Prezıdent N. Nazarbaev óńirlerde «Tilder týraly» zańnyń talaptary saqtalmaı otyrǵanyn tilge tıek etip, Prezıdent Ákimshiligine naqty tapsyrma berdi.

«Maǵan azamattar oryssha jazǵan hatyna qazaqsha jaýap alýda degen sybystar jetip jatyr. Eger adam orys tilinde ótinish berse, oǵan sol tilde, ıaǵnı orys tilinde jaýap alýy tıis. Prezıdent apparatyna barlyq oblystardy tekserýdi tapsyramyn. Muny jasap júrgenderdiń barlyǵy jumystan qýylsyn!», - dedi N. Nazarbaev.

Sondaı-aq, prezıdent Qazaqstannyń kópultty memleket ekenin taǵy bir eskertken.

«Sizder biletindeı, biz úsh tildi oqytýdy belgiledik. Osy betten taımaý kerek. Mádenıet mınıstrine zań baryn aıtqym keledi. Biraq, keıbir sheneýnikter alǵa qaraı asyǵystyq jasap, barlyǵyn qazaqsha sóıletkisi keledi. Biz – kópultty memleketpiz, biz osy faktini qabyldadyq», - dedi ol.