İshki ister mınıstri Qalmuhanbet Qasymov Taraz qalasynyń irgesindegi Býryl aýylyndaǵy jaǵdaıǵa qatysty pikir bildirdi, - dep habarlaıdy «Qamshy» portaly.

"Qazir jaǵdaı qalpyna keltirildi. Menińshe, dıasporalar men jergilikti bılik túsindirý jumystaryn júrgizdi, ákimdik pen quqyq qorǵaý organdary shara qoldanyp jatyr. Qazirgi ýaqytta jaǵdaı turaqtandy. Bizde ulttyq ulanymyz bar, ol kúsheıtilgen nusqaǵa ótti. Kúdiktige kúzet qoıyldy. Búgin ony qamaý týraly másele sheshiledi. (...) Barlyǵy baqylaýda, ol jaqta eshqandaı da rejım engizgen joqpyz", - dep málimdedi mınıstr Qalmuhanbet Qasymov. 

Sonymen qatar, aýylda jaýyngerlik qyzmet atqaryp jatqan áskerıler - Ulttyq ulan jaýyngerleriniń qyzmetine qatysty da jaýap berdi. Onyń aıtýynsha, áskerıler aýylda áli 1-2 kún bolady. 

"Menińshe, bul jetkilikti", - dep túsindirdi mınıstr.

"Bul turmystyq qylmys, menińshe. Qylmysker kinásin moıyndap otyr, barlyq saraptamany ótkizgende tergeý qıyn bolmaıdy dep oılaımyn, biz isti sotqa jyldam jiberemiz", - dedi ol.

Mınıstr bul jaǵdaıda ulttyq arazdyqtyń joqtyǵyn atap ótti. "Onyń ústine bul osy iste joq. Men osyny málimdeımin", - dep qorytyndylady İİM basshysy.

Esterińizge salsaq, D. Kavazogly degen azamat kórshisiniń úıine urlyqqa túsip, úıde oınap júrgen 6 jasar balany 11 jerden pyshaq sap óltirgen. Kúdikti dereý ustalyp, kinásin moıyndaǵan. Oqıǵadan soń aýyl turǵyndary bul jaǵdaıǵa narazylyq bildirip, D. Kavazoglynyń otbasy aýyldan kóshirilsin degen talap qoıdy. Narazalyq bildirgenderdiń birnesheýin polısıa ustap áketken. Sol ustalǵandardyń bosatylýyn talap etken aýyl turǵyndary keshe taǵy narazylyq bildirdi.

Oqıǵa ornynda júrgen Azattyq radıosynyń tilshilisinen ózderin "resmı organdardyń ókilimiz" dep tanystyrǵan bireýler planshetin tartyp alǵan. 

Eskertý: Foto men vıdeolar Azattyq saıtynan alyndy.