Jambyl oblysynyń Býryl aýylynda jaǵdaı qalypqa túsip, aýyl syrtyna qoıylǵan qorshaý alyndy, -  dep habarlaıdy «Qamshy» portaly Azattyqqa silteme jasap.

Aýylǵa kirip-shyǵý erkin, biraq kirgenderdi tekserip jatyr. Ár kósheniń basynda polıseıler júr. Aýyl ortalyǵynda da polıseıler men jol polıseıleri júr.   

Azattyq tilshisi halyqtyń tolqýyna sebep bolǵan "alty jasar balany óltirdi" degen kúdikti etnıkalyq túrik azamatynyń úıiniń kóship ketkenin baıqady. Úı bos tur, terezeleri synyp, qorshaýy qısaıǵan. Úı mańy men aýlasynda polıseıler júr.

Jambyl oblysy Baızaq aýdany Býryl aýylynda 17 aqpanda keshke qaraı júzdegen adam jınalyp, osynyń aldynda bolǵan tolqý kezinde qamalǵan azamattardy bosatýdy talap etken. Býryl turǵyndarynyń tolqýyna osy aýylda kishkentaı ul balanyń kisi qolynan qaza tabýy túrtki bolǵan. Keıin qastandyq jasaýshy kúdiktiniń etnıkalyq túrik ekeni habarlandy. Aýyl halqynyń basym kópshiligi - qazaqtar. 17 aqpanda Býryldy arnaıy ásker qorshaýǵa alǵan edi.

Búgin ishki ister mınıstri Qalmuhanbet Qasymov ta Býryldaǵy jaǵdaıdyń qalypqa túskenin málimdegen. Onyń sózinshe, jergilikti bılik pen dıaspora ókilderi halyq arasynda túsindirý jumystaryn júrgizip, quqyq qorǵaý organdary jaǵdaıdy baqylaýǵa alǵan. Qasymov buǵan qosa búgin kúdiktini qamaý máselesi sheshiletinin aıtty.