Qazaqstandyq qoǵam belsendisi, Bolathan Taıjan qorynyń prezıdenti Muhtar Taıjan polısıa basshylarynyń Jambyl oblysy Baızaq aýdany Býryl aýylynda bolǵan halyqtyq tolqýlarǵa qarýly jasaq kirgizgenine óz narazylyǵyn bildirdi, - dep habarlaıdy «Qamshy» portaly.

Óziniń Feısbýk áleýmettik jelisindegi paraqshasynda Muhtar Taıjan aýyldaǵy halyq narazylyǵyn basýǵa barǵan polısıa qyzmetkerlerine avtomat berý alańdatarlyq jaı ekenin aıtqan.

«Jappaı tártipsizdikterdi basý kezinde mılısıaǵa (polısıaǵa – red.) avtomat berilýi alańdatady. Onda taǵy da oqty qarý bar dep qaýiptenemin. Buǵan jol bermeý kerek. Sý shashatyn, kózden jas aǵyzatyn quraldar, rezeńke oqtar bar, adam ómirine qaýip tóndirmeıtin qarýlar qanshama? Nege el ishinde meıli jappaı tártipsizdikterdi basý úshin bolsyn, mılısıaǵa avtomattar beriledi? Biz buǵan úırenbeýimiz kerek. Álemniń eshbir elinde jappaı tártipsizdikti basýǵa adam óltiretin qarýlar qoldanylmaıdy», - dep jazady Muhtar Taıjan.

Belsendi sózine dálel retinde Azattyq saıtynan alynǵan avtomat asynǵan arnaıy jasaq jaýyngeriniń foto sýretin usynady.