Qazaq qol ónerin zaman talabyna saı damytýǵa atsalysyp júrgen baýyrlarymyzdyń biri – Nurdyn Turǵyn. Ol Qytaıdaǵy İle Qazaq avtonomıaly oblysynyń ortalyǵy Qulja qalasynda «Muraǵat» atty qolóner buıymdaryn shyǵaratyn seriktestik quryp, qazaqtyń materıaldyq mádenıetin nasıhattaýǵa, zamanǵa saı qoldanys aıasyn keńeıtýge úlesin qosyp keledi.
«Bala kezimizde anamyz ylǵı da bizge qazaqy oıý-órnekpen bezendirilgen kıim keshek kıgizetin. 2008 jyly mektepti bitirgenimde joǵary oqý ornyna túsip kete almadym. Oqýsyz júrgen jylymda ózimniń qyzyǵýshylyǵym boıynsha, Qulja qalasynda elektrık bolyp jumys istep kórdim. Júre kele joǵary bilimsiz, kósh sońynda qalýǵa bolmaıtynyn túsindim. Sóıtip, bir jyldan keıin qaıta tapsyrý arqyly ishki Qytaıdaǵy Shı An Jaratylystaný ǵylymdary ýnıversıtetine «Elektr-ınjenerıa jáne avtomattandyrý» mamandyǵy boıynsha oqýǵa tústim. Qalyń qytaı halqynyń arasynda júrgende sonaý bala kezdegi ústimizden tastamaıtyn qazaqsha kıimderimiz týraly oılanyp, osy salany qolǵa alsa, zamanaýı úlgimen ushtastyryp óndiriske salsa, kópke tanytsa dep oı túıdim», - deıdi Nurdyn baýyrymyz.
Oqýda júrgen ýaqytynda Qytaıdyń iri qalalaryn túgeldeı aralap, orasan aǵymdaǵy ónerkásip ıeleriniń eńbekterimen tanysqan. Ózi de solardyń qatarynda bolýǵa bel býǵan. Oqýdy bitirer jyly qysqy demalysynda Shyńjańǵa kelip, ápkesiniń ajarlandyrý salonyn ashyp, anasy ekeýi qazaqy órnektermen kómkerilgen kıim tigetin, ony pasdalanýǵa beretin dúken jumysyn júrgizip otyrǵanyn kóredi.
«Osy múmkindik pen meniń ıdeıam qabysyp, 2012 jyldyń sońynda «Nurdyn» degen saýda belgisin tirkettik. Oqýymdy bitirip kelip, jaqsy qyzmet tabylyp tursa da osy salaǵa bir jola bet túzedim. Bir jyl boıǵy shyǵarǵan ónimderimiz naryqtan ózindik ornyn alyp, jergilikti bılik bizge qoldaý kórsetti. Olardyń kásiptik oqytýy boıynsha 60 áıel bizge jumysqa turdy. 2014 jyly kásipkerligimiz «Muraǵat» JSHS bolyp quryldy. Anamyzdyń «murasy» ǵoı dep osylaı atadyq. Qurylǵaly beri biraz jetistikterge qol jetkizdik. Kóptegen halyqaralyq kórmelerge qatystyq. Biz ulttyq kıim-keshek, jasaý-jabdyqtar men qosa «3D» prınterdi de 2013 jyldan bastap qolǵa alyp, adamdardyń oı qıalyndaǵy zattardyń músinin kompúterlik baǵdarlamalar arqyly basyp shyǵarýdy júzege asyryp kelemiz», - deıdi Nurdyn Turǵyn.
Sońǵy úlgidegi quraldar men tehnologıany paıdalanyp atqarylǵan jumystar retinde marjannan tizip kórinis jasaýdy atap aıtýǵa bolady. «Muraǵat» seriktestigi ázirlegen 1,80×1,70 kólemindegi Muhtar Shahanov pen Shyńǵys Aıtmatovtyń portretteri tutynýshylardyń kóp qyzyǵýshylyǵyn týdyrǵan. Aqyn Muhtar Shahanovqa seriktestikte ázirlengen portret tartý etilipti de.
«Ol kisi razy bolyp, jaqsy baǵasyn berdi. Sondaı-aq, 3,20×1,70 ólsheminde Qazaqstannyń kórnekti tulǵalaryn da, sonaý handarymyzdan bastap, qazirgi prezıdentimizge deıin osylaı beıneledik. Bul jumystarymyz Naýryz merekesinde Astanada halyqqa kórsetilýi kerek edi. Bul jaqqa jumystarymyzdy kórsetýge «Nar jol» kompanıasy demeýshi bolyp jatyr. Saılaýǵa baılanysty bizben baılanysqan kisiler mamyr aıyna qaldyrdy. Prezıdentimizge arnaǵan marjan músindi jumysymyz qazir montaj ústinde, múmkindik bolsa ózine saýǵa retinde syılaýdy oılastyryp jatyrmyz», - degen Nurdyn Turǵyn ózderi ázirlegen portretti Elbasyǵa tartý etý josparlary bar ekenin aıtady.
Qazir 185 kisini turaqty jumyspen qamtyp otyrǵan kásiporyn Shyńjańdaǵy toı kıimin, qyz jasaýynyń jabdyqtaryn, qol óner buıymdaryn, merekleik sharalardy bezendirý jabdyqtaryn shyǵaratyn iri seriktestikke aınalǵan. Seriktestik basshysy kásiporynnyń aı saıyn 20 myń AQSH dollary shamasynda taza kiris kirgizetinin aıtyp otyr.
Erlan Tóleýbaı
