...Taǵy da jaýyrynshylar jyrmalanyp, sáýegeıshiler súmireıip qaldy...
Demokratıa ańsaǵan tuıaqbaıshaldar tuıyqqa tirelgen tusynda táńkıip jatyr. Májilistiń 84 ornyn nurotandyqtar tegeýrinimen tartyp aldy. Saýsaqpen sanarlyq jeti aqjoldyq pen tazdyń shashyndaı seldiregen jeti komýnıs áýpirimdep parlamentke iligip, jeti kúlshe taratýǵa kiristi...
Alashtyń rýhynan dámeli qos aqjoldyq jýrnalıser Qazybek ISA men Arman SQABYLULYnyń ózekterin ókinish sharpydy. «Jyǵylǵan - kúreske toımas» demekshi, armandaryna altynshy márte aıran tógilgen sezimniń serkeleri senimderin setinetip almasa ıgi-di. Arman aǵamyzdyń qapaly qalamynan:«Azat Perýashev - meniń dosym, biraq, Qazybek Isanyń májilis depýtaty bolýy - qymbat» degendeı dárgeı baıqadyq.
Menińshe, bul «túsinbestikke» (álde, túsinistikke...) Azat kináli emes. Ýaqyt talaby solaı: qoǵamǵa (álde, bılikke...) aqyldy adam qajet emes, aqshaly adam kerek. Sondyqtan, aqyldy zyndanǵa tastaýyń kerek te, aryńdy aıaýsyz lastaýyń kerek. Ekinshi jol joq.
Aqsha ózdiginen kelmeıdi. Belsheden baılyqqa batýyń úshin, belsheden betsizdikke batýyń kerek. Munda da balama joq.
«Alashtyń aıbyny», «Qazaqtyń qamy», «Eldiń múddesi» degen ádemi sózder qulaǵy men qoly bos (ıaǵnı, jumyssyz...) beıbaqtarǵa ǵana qyzyq. Júzdegen mıllıondaryn kóbeıtýdi armandaýdan kóńili bosap, kózi ashylmaıtyn mashkevıchter men shodıevter qazaqtyń múddesine túkirip qoıypty...
Aqyn aǵamyz Qazybek Isa óziniń marqasqa Mahambetke arnaýynda:
«Opasyz neme aqtalsa,
Opyǵy netken zor edi.
Bassyzdar eger kóp bolsa,
Basyńa qaýip tónedi...» - dep jazǵan edi, shynynda, bárin aıt ta, birin aıt, Kárim Qajymqanuly MÁSİMOVtiń tórtinshi ret QR Úkimet basshysy bolyp taǵaıyndalýynan qalyń qazaq eseńgirep qaldy...
Qudaýanda, bul netken jankeshtilik? On jyldan beri Másimov araǵa azdap úzilis salyp, el úkimetin qaıta-qaıta basqaryp keledi, sol on jylda qazaqtyń teńgesi 100 paıyzǵa qunsyzdandy, ál-aýqaty quldyrady, kedeıshilik qaptap ketti, biraq, jany siri Kárimov Úkimet-kemesinen túspeıdi. Sirá, qaı baǵytqa qozǵalý qajettigin bilmeýi de múmkin, áıtse de, tizginge tis-tuıaǵymen temirdeı qatyp qalǵan, eshkimge bermeıdi, jaýyryn da sıpatpaıdy...
...Bir kezde Nurtaı ÁBİQAEVty «seryı kardınal» dep pir tutatyn edik, búginde Nuraǵamyz quıryǵyn butyna qysqan «seryı volchonok»-qa aınalyp ketkendeı lám-mım demeıdi, senatta siresip-búrisip otyr...
...Bir zamanda, «oıbaı, ne deısiń, Imanǵalı TASMAǴAMBETOV anaý-mynaý sheneýnigińdi tastaı shyqyrlatyp shaınaı salady eken» dep jelpinetin edik, qazir Iman aǵamyz Kárim akanyń qabaǵyna qarap, tisi túsip, jaǵy sýalǵan kári arystandaı kózge túspeı, kóleńkege tyǵyla beredi...
...Bir kúnderi Ahmetjan ESİMOV «tájeloves qoı, salmaǵymen sandalǵannyń kezkelgenin myjyp óte shyǵady eken» dep, ásirese, Shamalǵan men Qaskeleńniń jigitteriniń keýdesine nan pisip, «pyrt» bolyp júretin edi, búgingi tańda Ahmetjan kókem de Kárim aka kóringen kósheden baǵytyn buryp, basy aýǵan jaqqa zyp beretin tárizdi...
Qalaı desek te, Kárim Qajymqanuly Másimovtiń «qudiretiniń» syryn eshkim sheshe de almaı, ese de almaı keledi...
Kárim Qajymqanuly Másimovtiń kandıdatýrasyn 107 depýtattyń 96-sy qoldap, 4-i qarsy shyǵypty, al, 7 depýtat qalys qalypty. Menińshe, qazaqqa shynaıy jany ashıtyn osy 11 májilisshi!
«Ákesi ólgendi de - estirtedi» demekshi, orys pen qytaıdyń, aǵylshyn men arabtyń tilin pistedeı shaqqan Kárim Másimov týyp-ósip, ónip-baıyǵan qazaqtyń tilin úırengisi kelmedi...
Qytaıtanýshy hám qarjyger, zańger hám ekonomıka doktory Kárim Másimov on jyldan asa ýaqyt qazaqtyń úkimetin basqaryp, qazaqtyń qaltasyna basy artyq soqyr tıyn sala almady...
Kárim Qajymqanuly qýanyp baryp, shattanyp qaıtatyn Máskeýdiń «Aeroflot»-y orystyń áýe joldarynan ushyp ótetin qazaq ushaqtarynan aqsha alyp, ózderi on ese jıi ushatyn qazaqtyń áýe joldaryna kók tıyn tólegisi kelmeıdi...
Sondyqtan, taǵy da Qazybek Isa aǵamyz aıtpaqshy: «...Ulttyq Jańarýdyń da kelmeı qoımaıtyny aqıqat» desek, «máńgilik» eldiń ýaqytsha Premer-mınıstri de máńgi bolmas, ýaqytsha oryspen «máńgilik dostyqtyń» shyn beınesi de belgili bolar...
«Tek sol kóktemniń, sol jańarýdyń tym keshigip kelýi kóp kesepatyn tıgizetini qıyn-aq… Kóktem keshikse, jańarý kesheýildeı berse, eski shirı beredi…» (Qazybek Isa)...
Qajymuqan ǴABDOLLA
