Ál-Farabı atyndaǵy Qazaq ulttyq ýnıversıtetinde fılologıa jáne álem tilderi fakúltetiniń uıymdastyrýymen «Qazirgi zaman keıipkeri. Gerold Belger» taqyrybynda dóńgelek ústel ótti, - dep habarlaıdy «Qamshy» portaly.

Atalmysh is-sharaǵa  «Lıteratýrnaıa Alma-Ata» almanaǵynyń redaktory Raıhan Bektemisova, belgili jazýshy Vladımır Vasılev, Gerold Belgerdiń jary Raısa Hısmatýllına, birqatar qoǵam qaıratkerleri, ǵalymdar, doktoranttar, magıstranttar men stýdentter qatysty.  Sonymen qatar dóńgelek ústel jumysyna  onlaın júıede S. Báıishev atyndaǵy Aqtóbe ýnıversıtetiniń, İ. Jansúgirov atyndaǵy Jetisý memlekettik ýnıversıtetiniń jáne Qorqyt ata atyndaǵy Qyzylorda memlekettik ýnıversıtetiniń til jáne ádebıt salasynyń ǵalymdary qatysyp, jazýshynyń ómiri men shyǵarmashylyǵy týraly óz pikirlerin bildirdi.   

Gerold Belger jazýshy, ádebıettanýshy, aýdarmashy, pýblısıs jáne qazaq eliniń patrıoty boldy. Ol qazaq ádebıetiniń Beıimbet Maılın, Ǵabıt Músirepov, Ábdijámil Nurpeıisov sekildi klasıkteriniń shyǵarmalaryn orys tiline aýdarǵan. Sondaı-aq onyń 53 avtorlyq kitaby bar.

Ál-Farabı atyndaǵy QazUÝ profesory, fılologıa ǵylymdarynyń doktory Alýa Temirbolat: «Óskeleń urpaqty úlgi tutar tulǵasyz tárbıeleý qıyn. Bizdiń oıymyzsha, Gerold Belger – qazirgi zamannyń naǵyz keıipkeri, qaharmany. Óıtkeni, ol ulty basqa bolsa da júregi qazaq dep soqqan jazýshy boldy. Kózi tirisinde talaı qoǵamdyq máselelerge ún qosty. Solardyń ishinde qazaq halqy men qazaq tiliniń taǵdyry ony qatty mazalaıtyn, – deı kele, Gerold Belger týyndylaryn tereń fılosofıalyq, psıhologıalyq jáne etıkalyq shyǵarmalarǵa jatqyzýǵa bolatyndyǵyn aıtty. «Jazýshy óz shyǵarmalarynda fılosofıalyq turǵydan oılana otyryp, psıhologıalyq jáne etıkalyq máselelerdi kóterdi. Onyń keıipkerleri qashanda kóp oılanatyn, ishteı tolǵanyp júretin adamdar. Adam qandaı bolýy kerek? Bolmys, mahabbat, baqyt, dostyq degen ne? Adam men qoǵam arasyndaǵy baılanysty qalaı ornatý qajet? Bul suraqtarǵa jaýapty onyń shyǵarmalarynan tabýǵa bolady», – dedi ol.