Qazaqstannyń burynǵy premer-mınıstri, sot úkimimen 8 jylǵa bas bostandyǵynan aıyrylǵan Serik Ahmetov Qaraǵandy oblysy Qarabas eldi mekenindegi el arasynda «KarLag qaqpasy» atalyp ketken AK 159/18 túzeý mekemesine etappen jiberildi, - dep habarlaıdy «Qamshy» portaly ratel.kz – ke silteme jasap.
Qaraǵandy oblystyq qylmystyq ister jónindegi apelásıalyq kollegıasynyń Serik Ahmetovtyń jazasyn on jyldan segiz jylǵa qysqartý, jazasyn jalpy rejımdegi túzeý mekemesinde óteý týraly úkimi kúshine engen soń, onyń tergeý ızolátorynda budan ary jatý múmkindigi joıylǵan edi.
Ahmetovtyń qaı túzeý mekemesine jiberilgenin onyń advokaty Georgıı Matvıenkov habarlaǵan.
«Bizdiń qorǵaýymyzda bolǵan Ahmetov seısenbi kúni Qarabas kolonıasyna aýystyryldy», - degen G. Matvıenkov.
Atalǵan eldi mekendegi túzeý mekemesindegi jaǵdaıǵa baılanysty sottalǵandar men olardyń týystary tarapynan túsken shaǵymdardyń kóptigine qaramastan Ahmetovtyń advokattary bul sheshimge qanaǵattanatyndyqtaryn aıtypty. Tipti, Matvıenkov úkim oqyla salysymen Ahmetovke ózin Qarabas kolonıasyna jiberý týraly ótinish jazýǵa keńes bergenin aıtqan.
İİM-niń Qaraǵandy oblysy boıynsha qylmystyq atqarý júıesi departamenti Serik Ahmetovtyń qaı túzeý mekemesine jiberilgeni týraly aqparat berýden bas tartqan.
Qaraǵandy oblysy Qarabas eldi mekenindegi AK 159/18 túzeý mekemesi el arasynda «QarLag qaqpasy» degen atqa ıe. Bul kolonıa óńirdegi eń kóne túzeý mekemesi sanalady. Stalındik qýǵyn-súrgin kezinde munda Keńes Odaǵynyń ár aımaǵynan jer aýdarylǵandar men qamaýǵa alynǵandar jazasyn ótegen. Qazirdiń ózinde munda 1000 shaqty adamjazasyn óteýde.
«Bul túzeý mekemesine «qonaq» bolǵan tanymal tulǵalar bir ǵana Serik Ahmetov emes. Budan buryn munda «ValútTranzıt bankiniń» qojaıyny Aıtbaqy Bilálov jazasyn ótese, qazir osy jerde sýdıaǵa oq jaýdyryp, isti bolǵan qaraǵandylyq advokat Evgenıı Tankov qamaýda otyr», - dep jazady ratel.kz.
Atalǵan túzeý mekemesindegi ustaý rejımi men mekeme ákimshiliginiń qyzmetine qatysty pikirler ár túrli. Bir jyldary osy kolonıada jazasyn óteýshiler men olardyń týystary mekeme ákimshiligin jazasyn óteýshilerdi soqqyǵa jyǵýda dep aıyptaǵan bolatyn.
Sondaı-aq, osydan eki jyl buryn Qarabastaǵy túzeý mekemesi erekshe mártebege ıe sottalǵandar otyratyn «VIP kolonıa» bolady degen de habar taraǵan edi.
