Ońtústik Qazaqstanda jappaı esek urlanyp jatyr. Sanaýly kúnniń ishinde Túrkistandaǵy ondaǵan aýyldan 50-den astam janýar joǵalǵan, - dep jazady QazAqparat.
Al olardyń terisi sypyrylyp, qulaqtary kesilgen ólekseleri aýyl mańynan tabylypty. Qara bazarda bir esektiń terisiniń quny 40 pen 150 myń teńge arasynda satylatyn kórinedi. Al onyń qulaǵynan tipti erkektiń qýatyn kúsheıtetin dári jasalady desedi jurt.
-Myna jerde baılanyp turatyn. Qazyǵyn sýyra almaǵan ǵoı. Kesip alǵan jipti, alyp shyqqan, -deıdi eseginen aıyrylǵan Qanatbek Jarylqasynov.
Urylar onyń jalǵyz esegin alyp ketken kezde qorada sıyr men qoı da turǵan eken. Biraq, naq salpańqulaqty kózdegen ury-qary jurt uıqyǵa ketken sátte ony aýyl mańyndaǵy saıǵa jetkizgen de qulaǵyn kesip, terisin sypyryp alǵan.
Endi turǵyndardyń esegi qarǵa-quzǵynmen ıt-qustyń jemtigine aınaldy.
Túrkistanǵa qarasty Eski Saýran aýylynda bir tún ishinde 22 esek joǵalypty. Urylar bárin aýyl shetine ákelip soıa bergen.
- Qyzylorda oblysyna ketip jatyr, estip jatyrmyz. Ózimde eki esek bar-tuǵyn. Ekeýinen de aıryldym, - deıdi Eski Saýran aýylynyń turǵyny Sársenáli Súleımenov.
Jylqy minýge jaǵdaıy joq jurt esekti bir qoıǵa aıyrbastap miniske jaratyp kelgen. Quny 30 myń teńgeden aspaıtyn janýardyń terisi ózinen qymbat turatynyn, tipti onyń qulaǵynan erkektik qýatty kúsheıtetin dári jasaýǵa bolatynyn estipti.
Eski Saýran aýylynyń turǵyny Murathan Saǵyndyqovtyń aıtýynsha, esektiń árbir terisin 40 myńnan, 80 myńnan. Bireýler 150 myńnan dep aıtyp jatyr. Óıtkeni terisi men qulaǵy dári eken.
Haıýandary joǵalar kúni qyzylordalyq nómir taǵyp, qora jaǵalap júrgen kólikti kórgen aýyldyqtar polıseılerge habar bergen eken. Tipti, kúdiktilerdi de anyqtap bergen. 5 kún ótken soń Jańaqorǵannan kelgen 5 adam ustaldy. 23 pen 49 jas aralyǵyndaǵy kúdiktiler ázirshe 10 esekti satqany týraly moıyndapty.
OQO İİD baspasóz hatshysy Saltanat Qarakózovanyń aıtýynsha, jábirlenýshilerge keltirilgen zalal mólsheri jarty mıllıon teńgege jýyq. Olar urlaǵan esekterdiń terisin qalaǵa ákelip, saýdaǵa salǵan.
Polıseılerdiń esebinshe, ár esektiń terisin saýda núkteleri 50 myńnan kem almapty. Qazir terini qabyldap alǵan oryndar da tekserilýde. Al, janýarlardyń jappaı joǵalyp, terisiz, qulaqsyz kúıde tabylyp jatqany týraly aqpar Túrkistannan bólek, taǵy eki aýdannan shyǵyp otyr, dep habarlaıdy ktk.kz.
