Qazaqstanda 5 mıllıonnan astam adamnyń túrli bankterde nesıeleri bar. Májiliske «Kolektorlyq qyzmet týraly» zań jobasyn alyp kelgen Ulttyq bank tóraǵasynyń orynbasary Alpysbaı Ahmetov osylaı dep otyr.

Ulttyq bank ekinshi deńgeıli bankterden alynǵan nesıelerdi qaıtarý tetikterin qarastyratyn jańa zań jobasynda kolektorlyq qyzmettiń zańdastyrýdy kózdep otyr. Bas bank basshylyǵy myna daǵdarys jaǵdaıynda bankke ýaqyty qaıtarylmaǵan nesıelerdi «bombaǵa» balaǵan.

«Erteń bul áleýmettik shıeleniske sebep bolýy múmkin. On-jıyrma adamnyń elektr qýaty ne qoqys tasýshylar aqysyn tólemeı qoıýy – basqa másele. Mundaı aýqymdy aıtsańyzshy! Mıllıonnan astam adamnyń bankterge trıllıon teńgeden artyq qaryzdar bolýy eldegi áleýmettik ahýal jaıly alańdaý týdyrady, - degen ol depýtattarǵa.

Jańa zańda boryshkerlerdiń nesıesin qaıtarýmen aınalysatyn kolektorlyq qyzmettiń damýyna qolaıly quqyqtyq jaǵdaı jasaý, qaryzdy óndirip alýda qaýipsizdik pen tıimdilikti arttyrý, boryshkerlerdiń quqyǵy men múddesin kolektorlyq agenttikter tarabynan bolýy múmkin zańǵa qaıshy áreketten qorǵaý, kolektorlyqtyń jarıalylyǵyn qamtamasyz etý máseleleri qamtylyp otyr.

Osy zań arqyly Ulttyq bank kolektorlyq agenttikterdi óz reestrine qosýdy, olardyń tirkeýsiz áreket etýine jáne bank qupıasy esebindegi derekterdi urlaý, satyp alý ne bopsalaý arqyly ıelenýine baılanysty jaýapkershilik taǵaıyndaýdy  usynady. Mundaı iske barǵan kolektorlarǵa qomaqty aıyppul salýdy ne úsh jylǵa deıin bas bostandyǵynan aıyrýdy zańdastyrýdy kózdep otyr.

Alaıda, depýtattardyń ózderi bul bastamaǵa qatysty túrli ustanym bildirdi. Gúljan Qaraǵusova jańa zań jobasyn «Mafıany basqarýǵa talpynys» dese, «Qarjylyq reketti zańdastyratyn» halyqqa qarsy zań dep otyr. Al, komýnıst depýtat Turǵyn Syzdyqov boryshkerlermen jumystyń júıelengeni, belgili bir zań normalarymen rettelgeni durys dep sanaıdy.