Qazaq biliminiń qara shańyraǵy ál-Farabı atyndaǵy Qazaq ulttyq ýnıversıteti osy aptada Kembrıdj ýnıversıtetiniń (Ulybrıtanıa) Pembrýk kolejinen, Túrkıa Respýblıkasynan jáne Iran Islam Respýblıkasynan kelgen qonaqtardy qarsy aldy, - dep habarlaıdy «Qamshy» portaly.
Úsh jaqty resmı kezdesý barysynda Túrki áleminiń mádenı qundylyqtaryn zertteý, nasıhattaý máseleleri sóz bolyp, «Iran-Turan» jobasyna baılanysty kelissózder júrgizildi.
İs-sapar barysynda qonaqtar QazUÝ murajaıyn aralap, ýnıversıtettiń jetken jetistikterimen, tarıhymen tanysty. «Sizderdiń ýnıversıtettiń zor múmkindikterin kórip, biz QazUÝ-ǵa osy aımaqtaǵy Irantaný ortalyǵyn basqarý quqyǵyn tapsyrýdy usynyp otyrmyz. Bizde jaqsy jyl kóktemnen bastalady deıdi. Jańa jyldaǵy ıgi bastamalar nátıjeli bolsyn», - dep Islam mádenıeti men baılanys uıymynyń vıse-prezıdenti Abbas Hamıar jınalǵan qaýymǵa óziniń usynys-tilekterin jetkizdi.
Atap ótetin bir jaıt Kembrıdjde Shahname ortalyǵy jumys jasaıdy jáne ýnıversıtette Parsy qoljazbalarynyń biregeı koleksıasy saqtalǵan. Sondyqtan «Iran-Turan» jobasyn Kembrıdj ýnıversıtetimen birlesip júzege asyrý úsh jaqqa da tıimdi.
«Ertede Túrkistandy Turan desken,
Turanda er túrigim týyp-ósken...», – degen aqyn Maǵjan Jumabaev óleńindegi tarmaqtar beker aıtylmasa kerek-ti. Bergisi túrkishildik, arǵysy turanshyldyq ıdeıasy kezdesý nátıjesinde jańa satyǵa kóterilip, damýdyń dańǵyl jolyna bet aldy.
Kembrıdj ýnıversıtetiniń Azıa jáne Taıaý Shyǵys fakúlteti dekany Charlz Melvıll Ulybrıtanıada Túrki elderiniń tarıhy men mádenıetin zertteý osydan eki ǵasyr buryn qolǵa alynǵandyǵyn jáne onyń sońǵy 15-20 jylda toqtap qalǵandyǵyn tilge tıek etti. «Kembrıdj ýnıversıtetinde túrkitaný mamandarynyń tapshylyǵy seziledi. Túrkitanýdy damytýdy aıta otyryp, tildi meńgerýdiń mańyzdylyǵyn atap ótý kerek», – dedi ol óz sózinde. Tıimdi kelissózder qorytyndysynda aldaǵy ýaqytta Kembrıdj ýnıversıtetinde Túrkitaný men QazUÝ-dyń ǵylymı ortalyǵyn ashý josparlandy. Osy oraıda QazUÝ-dyń Irantaný bólimi men Túriksoı kafedrasynyń úlken jobalarǵa bastamashylyq jasap, jemisti jumys atqaryp kele jatqanyn atap ótý kerek.
«Abý Nasyr ál-Farabı kezinde Shyǵys pen Batysty jaqyndastyrǵan ǵulama ǵalym bolǵan. Búginde bul uly mısıany ál-Farabıdiń atyn arqalaǵan álemdegi jalǵyz joǵary oqý orny jalǵastyryp otyr», – dedi Túrkıa premer mınıstriniń bas keńesshisi, BUU Órkenıetter Alánsynyń Túrkıadaǵy ulttyq úılestirý komıtetiniń tóraǵasy Bekir Qarlyǵa. Túrik ǵalymdary QazUÝ men Kembrıdj ýnıversıtetterine túrkitanýǵa baǵyttalǵan ǵylymı-zertteý jumystaryna qoldaý kórsetetindikterin jetkizdi. Kezdesý sońynda jan-jaqty kelissózder nátıjesinde yntymaqtastyq jónindegi úsh jaqty hattamaǵa qol qoıyldy.
