Búgin tańerteń Aqmola oblysy Atbasar aýdanynda ornalasqan Jabaı ózeni arnasynan asyp, sý bógeti buzyldy, - dep habarlaıdy «Qamshy» portaly 24.kz-ke silteme jasap.
Saldarynan jaqyn mańdaǵy úılerdi sý basý qaýpi tóndi. Osydan bir kún buryn 70-ten asa otbasy múlkimen qaýipsiz jerge kóshirilgen edi. Biraq birneshe ret jasalǵan eskertýlerge qaramastan birqatar turǵyn kóshpeı qalǵan. Erigen sýmen 500-den astam qutqarýshy men jergilikti turǵyndar kúresip jatyr. Kómekke Ońtústik Qazaqstan oblysynan tótenshe jaǵdaılar departamentiniń qyzmetkerleri de jumyldyrylýda.
Aıta ketý kerek, aýdanda tasqynǵa qarsy sharalar júrgizý úshin 80 mln teńgedeı qarjy qarastyrylǵan. Qazir topyraqtan uzyndyǵy 4 shaqyrym bolatyn dýal turǵyzylyp, ózen boıyna ınertti materıal salynǵan 9 myń qapshyq qalandy. Qala men aýyl mańaılarynda mundaı jumystardyń júrgizilýi tegin emes. Eki jyl buryn Atbasar qalasynda tilsiz jaýdan 529 úı zardap shegip, ony qaıta qalypqa keltirý úshin 4 mlrd teńgege jýyq qarjy ketken edi.
Nurjan Qambatyrov, Atbasar qalasynyń ákimi:
- Áleýmettik nysandardyń, №1 jáne №4 orta mektepterdiń mańy bekitildi. Bul mekemeler tolyqtaı oqshaýlandy. Sonymen qatar, ózen jaǵasynda ornalasqan úıler de nazardan tys qalǵan joq. Qala men Zarechnyı aýylyna qaraı keletin ózen arnasy da myqtap bekitildi.
