Arǵy atam er túrik,
Biz qazaq elimiz.
Samal taý, shalqar kól,
Saryarqa jerimiz.

Saı saılap, mal aıdap
Saırandap, ıen jaılap,
Erke ósken Arqanyń
Erkesi serimiz.

Biz júrgen alashtyń
Shyn kemeńgerimiz!
Egessek el bermes
Eńiregen erimiz.

Buǵaýdan bosaǵan,
Biz doly arystan.
Doldansa bolmaıtyn,
Jańa dáý perimiz!

At minsek, jel bolyp,
Sýyldap shabamyz.
«Lap!» desek erlenip,
Dýyldap janamyz.

Alashtyń aq týyn
Qolǵa alyp, aqyryp,
«Alash!» dep shapqanda,

Jaýǵa oıran salamyz!

Er túrik ejelden
Oq tesken etimiz!
Qaımyǵyp esh jaýdan,
Qaıtpaǵan betimiz.

Jaýsyn oq, aqsyn qan,
Shyqsyn jan, qorqý joq.
Alashtyń jolynda,
Jan qımaq - nıetimiz.

Bizderge sóz be eken,
Jaýyńnyń kóp, azy!?
Ólsek haq shahıtpiz
Óltirse biz qazy.

Jol bolyp jaý shaýyp.
Saý qaıtsaq bolamyz,
Qazaqtyń shyn uly,
Qaharman sabazy!

Alashtyń árýaǵy
Jebesin, qoldasyn!
Aqsaqal tileı gór,
Sapardy ońdasyn!

Jasaǵan jar bolyp,
Qazaqtyń eline
Jasatsyn, saqtasyn
Alashtyń ordasyn!