Qazaqstan basshysy Túrkıalyq áriptesimen kezdesti, - dep habarlaıdy «Qamshy» portaly Aqordanyń baspasóz qyzmetine silteme jasap.

Nursultan Nazarbaev pen R.Erdoǵan kezdesýde Túrkıa Prezıdentiniń Qazaqstanǵa byltyr sáýirdegi saparynda qol jetken ýaǵdalastyqtardyń júzege asyrylý barysyn qarastyrdy.

Sondaı-aq eki el kóshbasshylary saýda-ekonomıka, ınvestısıa, aýyl sharýashylyǵy jáne mádenı-gýmanıtarlyq salalardaǵy yntymaqtastyqty nyǵaıtý máselelerin talqylady. Bul baǵyttarda birlesken perspektıvaly jobalar bar ekeni, olardy júzege asyrýǵa eki eldiń shaǵyn jáne orta bıznes ókilderi qatysa alatyny aıtyldy.  

Memleketter basshylary halyqaralyq kún tártibindegi ózekti máseleler men terorızmge jáne ekstremızmge qarsy kúres aıasynda qabyldanyp jatqan sharalar jóninde pikir almasty.

Qazaqstan Prezıdenti bıyl naýryz aıynda Ankarada bolǵan terrorlyq aktige baılanysty R.Erdoǵanǵa taǵy da kóńil aıtty.

Ekijaqty qarym-qatynas máselesine toqtalǵan Memleket basshysy Túrkıanyń jetekshi kompanıalary men holdıńteriniń memleketimiz tarapynan eleýli qarajat bólinip otyrǵan ındýstrıalyq-ınnovasıalyq damý jáne «Nurly jol» baǵdarlamalaryn júzege asyrýǵa belsene qatysa alatynyna nazar aýdardy.

Memleket basshysy Qazaqstannyń Dúnıejúzilik saýda uıymyna kirýi taýar aınalymyn, sonyń ishinde Túrkıamen aradaǵy taýar aınalymy kólemin arttyrý úshin elimizdiń  aldynan zor múmkindikterge jol ashatynyn aıtty.   

Qazaqstan Prezıdenti bizdiń respýblıkamyzdyń tranzıttik-kóliktik áleýeti joǵary ekenin, ony eki el ekonomıkasynyń ıgiligine tıimdi paıdalanýǵa bolatynyn atap ótti.

Sonymen qatar Memleket basshysy Antaláda «EKSPO-2016» jáne Astanada «EKSPO-2017» kórmesin ótkizý turǵysynan Qazaqstan men Túrkıanyń tájirıbe almasýy mańyzdy ekenine nazar aýdardy. 

R.Erdoǵan birqatar baǵyttar boıynsha alǵa qoıylǵan maqsattarǵa jetý úshin ekijaqty yntymaqtastyqty odan ári nyǵaıtý qajettigin aıtty.