QR Táýelsizdiginiń 25 jyldyǵy jáne Almaty qalasynyń 1000 jyldyq mereıtoılary qarsańynda ál-Farabı atyndaǵy Qazaq ulttyq ýnıversıtetinde jyl saıynǵy dástúrmen túrkitektes elderdiń ortaq merekesi – Áz-Naýryz meıramy keń kólemde atap ótildi, - dep habarlaıdy «Qamshy» portaly.

Sońǵy 5 jyl kóleminde  QazUÝ aıtýly merekeni QR Syrtqy ister mınıstrligi jáne ońtústik astananyń elshilik bólimderimen birige toılap keledi. Oqytýshy-professorlar quramy jáne stýdenttermen qatar jıynǵa 50-den asa sheteldik qonaqtar qatysty. Onyń ishinde Qytaı, AQSH, Túrkıa, Iran, Ispanıa, Fransıa, GFR, Koreıa, Indıa jáne t.b. memleketter elshilikteriniń basshylary, BUU, ESKATO, AÓYSSHK uıymdary men sheteldik jetekshi JOO-lar ókilderi boldy.   

Jańarý men órkendeýdiń meıramy Naýryz baǵdarlamasy aıasynda sheteldik qonaqtardyń jyl saıyn QazUÝ-dyń jańa ınfraqurylymdyq nysandarymen tanysýy búginde dástúrge aınalyp otyr. Bul joly álemdik keńistikte teńdesi joq «Keremet» stýdentterge qyzmet kórsetý ortalyǵy shaqyrylǵan qonaqtarǵa úlken áser qaldyrdy. Qytaı eliniń Qazaqstandaǵy bas konsýly Chjan Veı atap ótkendeı, «bir tereze» qaǵıdasy boıynsha qyzmet kórsetetin osyndaı biregeı ýnıversıtettik servıs ortalyǵynyń bolýy kóptegen álemdik JOO-larǵa úlgi».

Sondaı-aq QazUÝ qalashyǵynda jańadan boı kóterip, qoldanysqa berilgeli otyrǵan 25 metrlik júzý baseıniniń ǵımaraty tanystyryldy. Turǵyzylǵan ǵımarat qurylysy memlekettik jekemenshik áriptestik negizinde  iske asyrylǵan jáne jýyq arada bul baseınde ýnıversıtet stýdentteri ǵana emes, qala turǵyndary da júze alatyn bolady.

Yrys pen yntymaqtyń jarshysyna aınalǵan merekege oraı 25 kıiz úı tigilip, jıylǵan kópshilikke ulttyq taǵamdarmen kómkerilgen aq dastarqan jaıyldy. Merekelik sharany QazUÝ rektory Ǵalym Mutanov ashty. Ol: «Búginde Naýryz – ultymyzdyń osy kúnge deıin jetken syndarly jetistikteri, qýanyshty jeńisterimen úndesken mereke. Dostyq pen kelisim, senim men túsinistik basty ustanymy bolǵan qazaq elin kórkeıtken Elbasymyzdyń eńbeginiń arqasynda jańa jyldy jańa jetistiktermen, jarqyn bolashaqqa degen senimmen qarsy alyp otyrmyz», – dep sóz bastap, jıylǵan kópshilikke júrekjardy tilegin jetkizdi. Elshilik bólimderdiń atynan Qazaqstandaǵy AQSH-tyń Bas konsýly Mark Mýdı shyǵyp, ýnıversıtet ujymyn jáne barsha qazaqstandyqtardy qazaq tilinde quttyqtady.

Jıyn barysy odan ári ýnıversıtet stýdentteri men kórkemónerpazdar úıirmeleriniń músheleri daıyndaǵan «Naýryz-Nurly jol» atty merekelik konsertpen jalǵasyn tapty. Ónerpazdar atynan atalmysh meıramdy áspetteıtin «Báıterek», «Samuryq», «Kún», «Jaqsylyq pen jamandyq»,  «Jerdiń oıanýy», «Jeti dánniń týylýy», «Jibek joly», «Almatyǵa 1000 jyl» atty mýzykalyq-teatrlandyrylǵan qoıylymdary qoıyldy. Dombyradan kúmbirli kúı tógilip, bı bılenip, ónerli jastardyń syıy retinde áýezdi ánder áýeledi.

Ýnıversıtet basshylyǵy men meıramnyń qurmetti qonaqtary birigip, elimiz ben ózge memleketter arasyndaǵy dostyq qarym-qatynas ulǵaıa bersin degen nıetpen qalashyqtaǵy «Beıbitshilik baǵyna» aǵash kóshetterin otyrǵyzdy.