Óskemende óli kúıinde tabylǵan 14 jastaǵy Medet Maratovtyń týystary onyń ólimine qatysty boljam jasady. Olardyń aıtýynsha, mektep oqýshysyn qyz úshin óltirgen, - dep habarlaıdy Qamshy.kz YK-news.kz-ke silteme jasap.

Joǵalyp keterdiń aldynda Medet synyptasyn sabaqtan keıin úıine shyǵaryp salady. Týystarynyń aıtýynsha, bul kóshedegi beınebaqylaý kamerasyna jazylyp qalǵan. Osydan keıin balany eshkim kórmedi.

"Bul anyq kisi ólimi. Sebebi, Medettiń denesine alty ret pyshaq suǵylǵan, al basyna soqqy jasalǵan. Biz muny kimniń, ne úshin jasaǵanyn ázirshe bilmeımiz. Medet óte sabyrly, ustamdy bala boldy. Fýtbolǵa qyzyǵatyn, mektepten keıin birden úıge keletin edi. Al bul joly qaıta oralmady..., - dedi Medettiń týysy - Elnýra Jumaǵulova. - Ony osylaı jazalaıtyndaı kishkentaı balanyń ne istep qoıǵanyn bilmeımiz! Oqıǵa bolardyń aldynda Medettiń qyzyl tústi kóliktiń júrgizýshisimen sóılesip turǵanyn synyptastary kórgen. Sabaqtan keıin ol synyptas qyzdy úıine aparyp tastapty. Sol qyz birdeńe bilýi múmkin. Qyzdyń kámelettik jasqa tolmaýynan odan birdeńe surap bilý qıyn. Degenmen polıseıler onyń týystarymen, ózimen sóılesip jatyr. Múmkin onyń burynǵy jigiti Medetten qyzǵanǵan bolar...".

Eske salaıyq, 20 sáýir kúni Praporshıkovo aýylyndaǵy segizinshi synyp oqýshysy Medet Maratov úıine oralmaǵan bolatyn. Kelesi kúni onyń denesi tabyldy. Jantúrshigerlik ólimniń mán-jaıyn anyqtaý maqsatynda jedel tergeý toby quryldy. Oqýshynyń ólimine qatysty qozǵalǵan isti SHQO İİD baqylaýǵa aldy.