Astanada brıfıń ótkizgen Bilim jáne ǵylym mınıstri Erlan Saǵadıev jýrnalıserdiń saýaldaryna jaýap beri, qolǵa alynyp jatqan reformalardyń jaı-japsaryn túsindirdi, - dep habarlaıdy Qamshy.kz.

Mınıstr sondaı-aq, «úsh tildi oqytý» júıesine narazylyq tanytyp, ashyq hat joldaǵandardy da túırep ótken.

«Men ol petısıany oqydym. Qol qoıǵandardyń ishinde jasy úlken, qurmetti azamattardyń baryn túsinemin. Meniń oıymsha, olar bizdiń jobany túsinbegen sıaqty. Olardyń basyn qosyp, barlyǵyn túsindirip bermekpin. Bul – bir. Ekinshiden, olardyń ishinde óz balalaryn memleket qarajatyna oryssha da, aǵylshynsha da shet elderde oqytqandar bar. Olar bireý de emes, ekeý de emes. Olarǵa ne kerek? Olar ózderin elıta sanaıdy, al, qarapaıym qazaqtarǵa bilim kerek joq dep esepteıdi», - deıdi mınıstr.

Petısıadan úzindi keltirgen mınıstr qazaqtar jaqsy bilim alýǵa ne úshin talpynýy kerektigin túsindirýge tyrysqan.

«Olar «Malshylar, qurylysshylar men kúzetshilerge, bazarda turǵan halyqqa aǵylshyn tili kerek emes» dep sanaıdy. Meniń ákemniń ákesi malshy bolǵan. Al, ol óz ulyn Almatyǵa ákelip, keıin Máskeýge jiberip oqytty. Uly akademık boldy. Sizder barlyqtaryńyz ony bilesizder. Qazirgi ıntellıgensıa ókilderiniń barlyǵy – malshylardyń balalary. Solaı emes pe? Sondyqtan, árbir ata-ana óz balasynyń jaqsy bilim alyp, laıyqty azamat bolǵanyn qalaıdy», - deıdi E. Saǵadıev ashyq hat joldaǵandarǵa qarata.

Esterińizge salsaq, elimizdiń birqatar ıntellıgensıa ókilderi, qoǵam jáne memleket qaıratkerleri mınıstrdiń bastamasyna narazylyq bildirip, ashyq hat joldaǵan bolatyn.