Aqtóbe oblysy, Qyzyljar-2 aýylynda joldyń joqtyǵynan búldirshinder mektepke zırattardyń arasymen baryp júr. Tipti kishkentaı balalar adamdy jerleý rásimderine san márte kýáger bolǵan eken, - dep habarlaıdy 31 arna.

Óıtkeni, molalardyń arasyndaǵy jalǵyz aıaq joldan basqa kórshi aýyldyń úsh shaqyrym jerdegi mektebine aparatyn jol joq. Al tıisti mekeme mamandary, bilim ordasyn salý úshin eki aýyl arasyndaǵy ara qashyqtyq úsh shaqyrymnan asý kerek deıdi. Avtobýs bólý úshin de mekteppen ara qashyqtyq úsh shaqyrymnan asýy kerek eken deıdi shendiler.

Aýyl balalary kórshi Qyzyljardyń mektebine qatynap oqıdy. Aýylda myń jarym shańyraq bar. Biraq áli kúnge deıin mektep salynbapty. Mektep túgili qoǵamdyq kóliktiń ózi  jol bolmaǵandyqtan, aýyldy aınalyp ótetin kórinedi. Al avtobýsqa barý úshin halyq tas jolǵa deıin jaıaý barady. Balalardyń ózi de qarshadaıynan talaı ret adamdy jerlep jatqanyn, qorymdar qazyp jatqanyn kórip ábden shoshyp bolǵan.

Qyzyljar-2 aýyly turǵyndaryna mektep salý da, jol tartý da búdjette josparlanǵan. Biraq qashan júzege asatyny áli de bolsa beımálim.