Záýresh Battalova jer komısıasynyń jumys tártibin synǵa aldy, - dep habarlaıdy Qamshy.kz.

Búgin tańerteń Astanada bastalǵan Jer reformasy jónindegi komısıanyń alǵashqy otyrysynda komısıa múshesi, Qazaqstanda parlamentarızmdi damytý qorynyń prezıdenti Záýresh Battalova komısıanyń jumys tártibiniń bir tarmaǵyna kópshiliktiń nazaryn aýdartty. Atap aıtqanda, Záýresh Battalovaǵa «Komısıada sheshim kópshilik daýsymen qabyldanady» degen talap unamaı otyr.

«Men barlyǵyńyzdyń atalǵan reglamenttiń 11-tarmaǵyna nazar aýdarýlaryńyzdy suraımyn. Otyrys dıskýssıa úshin dıskýssıa jasaýǵa ulaspaýy kerek. Biz máseleni talqylaı otyryp, belgili-bir toqtamǵa kelýimiz kerek. Máseleler daýys berýge qoıylmaýy qajet. Biz parlamentte otyrǵan joqpyz jáne parlament depýtattary emespiz», - dedi Z. Battalova.

«Eger, tipti, bir adam bolsa da bul sheshimge qarsy bolsa, onda sheshimdi barlyǵynyń kóńili tolatyndaı etip qabyldaýǵa tyrysý kerek. Eger osy reglamentte atalǵandaı daýys beretin bolsaq, bul qoǵamdy bir toqtamǵa ákele almaıdy», - degen eks-senator reglamenttiń atalǵan tarmaǵyn ózgertip, árbir sheshimdi kelisip qabyldaý týraly másele kóterdi.