Abaılańyz alaıaqtar! Almatyda tutynýshylardan zańsyz aqsha jınaıtyn top paıda boldy, dep habarlaıdy Qamshy.kz KTK arnasyna silteme jasap.
«AlmatyEnergoSbyt» mekemesiniń atyn jamylǵan olar túrli syltaý aıtyp, dúken qojaıyndaryn taqyrǵa otyrǵyzyp ketken. Máselen, sońǵy bir aıdyń ózinde dál osyndaı on derek tirkelipti. Alaıda eshkim tártip saqshylaryna shaǵymdanbaǵan. Sondyqtan elektr qýatymen qamtamasyz etýshi mekeme qyzmetkerleri kásipkerler men turǵyndardy ákki qýlardyń quryǵyna túsip qalmaýǵa shaqyrýda.
Jan-jaǵyna jaltaqtaı qarap, dúkenge kirgen azamat Olga Býkreevany san soqtyryp kete jazdaǵan. Qyzmettik kýáligin kórsetip ózin «AlmatyEnergoSbyt» mekemesiniń qyzmetkerimin dep tanystyrǵan alaıaq dúkendegi jaryqty óshirýge kelgenin aıtypty. Iaǵnı jelilerde aqaý shyǵyp, tórt kún boıy elektr qýaty bolmaıdy dep bósken. Al aqsha berse, máseleniń ońaı sheshiletinin aıtqan.
-Ol mennen 15 myń teńge surady. Iaǵnı, aqshany búgin berseńiz, bastyqpen bólisip, jaryqty óshirmeımiz dedi. Men osydan keıin birden tıisti mekemege habarlasyp, eshqandaı jelide apat bolmaǵanyn anyqtadym. Al alaıaq birden izin sýytyp úlgerdi, - deıdi dúken qojaıyny Olga Býkreeva.
Osydan keıin álgi azamat bul dúkenge múldem jolamaǵan. Esesine basqa kásipkerlerdi taqyrǵa otyrǵyzyp ketipti. Iaǵnı sońǵy bir aıdyń ishinde «AlmatyEnergSbyt» mekemesine onshaqty dúken qojaıynynan shaǵym túsken. Barlyǵynda da alaıaqtar túrli sebep aıtyp, kásipkerlerden jeti myń men 20 myń teńge aralyǵynda aqsha alypty. Tipti jalǵan hattama toltyryp, túbirtek bergen. Alaıda jaryqqa jaýapty mekeme qyzmetkerleri eshqashan qolma qol aqsha almaıtyndaryn aıtyp otyr.
-Barlyq tólemder ınternet-bankıng, kasa bolsyn júredi. Qolma qol aqsha suraýǵa «AlmatyEnergoSbyt» qyzmetkerleriniń quqysy joq. Sáýirde kóbeıip ketti mundaı jaǵdaılar. Osy mamyr bastalǵaly taǵy bastaldy. Buryn 7-8 myń surasa qazir 15 myń suraıtyn boldy, - deıdi «Almaty Energokesheni» AQ baspasóz hatshysy Jandarbek Qatpabaev.
Alaıda aldanǵandardyń birde biri polısıaǵa shaǵymdanbaǵan. Sondyqtan ázirge ońaı olja kózdegenderdiń aıy ońynan týyp tur. Al «AlmatyEnergoSbyt» mekemesi bul jerde tutynýshylardy saq bolýǵa shaqyrýmen ǵana shektele alady.
