BTA banki tóraǵasynyń burynǵy orynbasary Jaqsylyq Jarymbetovten tárkilengen quny 11 mln. fýnt sterlıńten asatyn jyljymaıtyn múlik Londonda aýksıonǵa qoıyldy dep habarlaıdy Qamshy.kz QazAqparatqa silteme jasap.

Quny 4,5 mln fýnt sterlıń bolatyn Winchmore Hill jekejaıy bar jyljymaıtyn múliktiń satylatyny týraly habar Brıtanıanyń premeri Devıd Kameron jemqorlyqqa qarsy samıtti ashyp, osy aptada ofshorlyq kompanıalardyń arqasynda jasyrynatyn jyljymaıtyn múlikti satyp alýshylarmen kúresetinin aıtqan soń BAQ-ta paıda boldy.

Bir kezderi brıtanıalyq ánshi Rob Stúarttyń ıeliginde bolǵan záýlim úıde baqshasy, jabyq baseıni jáne saýna bar.

Brıtanıalyq Evening Standard agenttigi habarlaǵandaı, Jarymbetov záýlim úıdi Brıtanıalyq Vırgın araldarynda tirkelgen Smaland Property Holdings kompanıasy arqyly 2009 jyly 5,6 mln fýnt sterlıńke satyp alǵan.

Quny 4 mln fýnt sterlıńti quraıtyn  Longwood  derbes úıi aýksıonǵa qoıyldy. Quny 2,2 mln fýnt sterlıńti quraıtyn   Bıshops avenúde ornalasqan úsh bólmeli páter satylýǵa daıyndalyp jatyr. 

Basylym atap ótkendeı, QR Joǵarǵy soty Jaqsylyq Jarymbetov qazaqstandyq mıllıarder Muhtar Áblázovke BTA bankiniń qarajatyn zańsyz jymqyrýǵa kómektesti dep  qaýly etken. Eki bıznesmen de Londonǵa qashqan.