Qytaıdyń Sánshı kúndelikti gazeti 9 mamyr kúngi sanynda Sánshı astyq korporasıasy Qazaqstannyń 3000 gektar jerine bıdaı egetinin habarlady. Bul týraly Qamshy.kz jazady.

Sondaı-aq, "Jospar boıynsha Qytaı tarapy maýsym aıynda Qazaqstannan 2500 tonna un satyp alýdy kózdep otyr", - dep jazady basylym. 

Qytaılyq basylymnyń habarlaýynsha, Sánshı ólkesiniń astyq kompanıasy Qazaqstan jerine zertteý júrgizip, birqatar óndiris oryndarynyń jumysymen tanysqan. Atap aıtqanda, Qazaqstannyń «Baıserke» maı shyǵaratyn kompanıasy, «Altyn dıirmen» jáne «Azıa Food» kompanıalarynyń ónimderin Qytaıǵa eksporttaý jáne Qazaqstannyń aýylsharýashylyǵyna ınvestısıa quıý jóninde kelisim jasalǵan. Basylym eki el arasyndaǵy eksport-ımport jóninde áli de birqatar kelissózder júrip jatqanyn jazady. 

Basylym bul kelisimderdiń Qytaı úkimetiniń jáne Sánshı ólkesiniń ekonomıkalyq josparyna saı keletinine nazar aýdartqan.