«Depýtattyń balasy jaýapqa tartylmaıdy degen Qazaqstanda zań bar ma?!» Dál osylaı dep Almaty oblysynyń turǵyny Maqsat Qoshmaǵanbetov shaǵymdanyp otyr. Aıtýynsha, Qapshaǵaı qalasynyń máslıhat depýtaty Serikbaı Nurjanov ulynyń jasaǵan qylmysyn túrli áreketpen japqysy keletin kórinedi, - dep habarlaıdy Qamshy.kz 31 arnaǵa silteme jasap.Tipti jábirlenýshi tarap, halyq qalaýlysy ulymnyń jasaǵan qylmysyn jasyrsańdar, jaǵdaılaryńdy jasaımyn dedi deıdi.
Oqıǵa osydan týra eki jyl buryn Qapshaǵaı qalasynda bolǵan. Samǵat Maqsatulynyń aıtýynsha, dál osy klýbtyń aldynda Aıbek Nurjanov esimdi azamat bir jigitpen sózge kelispeı qalady. Nasyrǵa shapqan sátti kórgen soń tanysym bolǵandyqtan Aıbekti arashalamaq boldym deıdi Samǵat. Biraq kútpegen jerden travmatıkalyq qarýdan atqan Aıbektiń oǵy meniń kózime tıip, oń janarym aǵyp ketti-, deıdi Qapshaǵaı turǵyny.
SAMǴAT MAQSATULY, Jábirlenýshi:
- Ata bastady. Men artynan júgirip toqtataıyn dep oıladym. Kórdi, men artynan júgirip bara jatqanyn bilip turyp, artyna qarady da meni atyp túsirdi. Oń kózim jaraqat aldy. Oq áli tur. Kózim kórmeıdi. Protezben júrmin.
Jábirlenýshi taraptyń sózinshe, Aıbek Nurjanov buǵan deıin quzyrly organda qyzmet etken. Osy oqıǵadan keıin birden jumystan shyǵyp, kórinbeı ketken eken. Al, bul oqıǵaǵa qatysty qylmystyq is qozǵalyp, izdeý jarıalanǵan. Polısıa istiń zańdy negizde júrgizilip jatqanyn aıtady.
ÁSET JOLDYBAEV, Qapshaǵaı qalalyq İİB aǵa tergeýshisi:
- 2014 jyly kúdikti halyqaralyq izdeýge jarıalanyp, sot qaýlysy bultartpaý sharasyna qamaý qaýly qabyldanǵan. Aǵymdaǵy jyldyń sáýir aıynda kúdikti QR qylmystyq is júrgizý kodeksiniń 128 babyna sáıkes ustalyp, qylmystyq is zańdylyqqa sáıkes sotqa jiberilgen. Sot qaýlysy negizinde bultartpaý sharasy kepilge ózgertilip, naqty ýaqyt qylmystyq is aıaqtalý barysynda jáne aǵymdaǵy jyldyń mamyr aıynyń 25-ne deıin qylmystyq is aıyptaý aktisimen Qapshaǵaı qalasynyń prokýratýrasyna joldanady. Odan ary sotqa joldanady.
MAQSAT QOSHMAǴANBETOV, Samǵattyń ákesi:
Qapshaǵaı qalasynyń depýtaty Serikbaı Nurjanovtyń balasy Aıbek Nurjanov meniń balama oq atyp, kózin aǵyzyp jiberdi. Ákesi-sheshesi keshirim surap keldi. Balańnyń jaǵdaıyn jasap beremiz, biraq sender pokazanıany ózgertesińder, meniń balamdy atqan joq dep basqa bireýdi kórsetesińder.
Jábirlenýshi tarap osylaısha halyq qalaýlysynyń ózi bizge yqpal etti dep ashynady. Al máseleniń mán-jaıyn bilýge barǵanda, Máslıhat depýtaty Serikbaı Nurjanovty jumys ornynan tappadyq. Tipti Serikbaı Nurjanov úıinde de bolmaı shyqty, qońyraýymyzǵa da jaýap bermedi.
