Astanada ótip jatqan Jer máselesi jónindegi komısıanyń ekinshi otyrysynda Eýropa ǵylym akademıasynyń akademıgi, Halyqaralyq adam ınstıtýtynyń prezıdenti Januzaq Ákim órkenıetti elderdiń kóshinen qalys qalmas úshin beıbit mıtıńke tyıym salýdy toqtatý kerek dedi, - dep habarlaıdy Qamshy.kz. 

Qazirgi jaǵdaıdy tynyshtandyrý úshin basshylar bolsyn, prezıdent bolsyn, halyqtyń aldynda keshirim suraý kerektigin aıtqan Januzaq Ákim «Bizdiń zańdar keńes zamanyndaǵy zańdar sıaqty. Órkenıetti elderdiń kóshinen qalys qalmas úshin mıtıńke tyıym salatyn zańdardy alyp tastaý kerek dep oılaımyn. Eýropa elderinde mundaı sharalar apta saıyn ótip jatady. Beıbit sherýdi halyqtyń pikirin erkin bildirý amaly retinde qabyldaǵan jón», - dedi.

Buǵan Bas prokýrordyń orynbasary A. Kravchenko myrza eshkimdi zańsyz qýdalaý bolmaǵanyn, aldyn ala eskertý jumystary júrgenin, zańsyz sherýge ashyq shaqyrǵan birneshe azamattyń ákimshilik jaýapkershilikke tartylǵanyn aıtty. Ol otyrys ústinde A.Kravchenko zańsyz mıtıńke shaqyrǵany úshin shamamen 40 belsendi tutqynǵa alynǵanyn málim etken bolatyn.

Alaıda, komısıadaǵy quqyqtyq top jetekshisi M. Taıjan A. Kravchenkomen kelispeıtinin alǵa tartty.

 «Men olardyń ruqsat etilmegen mıtıńke shaqyrǵanyn túsinemin. Degenmen, olar ony áli de jasaǵan joq. Ustaý tún ishinde júrgizildi. Siz polısıa kúsh qoldanǵan joq deısiz, qoldandy, vıdeosy bar. Ata-analarynyń úıine tintý júrgizdi. Osyny túsinesiz be? Qazir bizdiń barlyǵymyz da barynsha abaı bolýǵa, ustamdy bolýǵa tıispiz. Memleketke uıymdasqan ınstıtýt retinde emosıonaldy adamdarǵa qaraǵanda zor jaýapkershilik júkteledi», - dedi ol QR Bas prokýrorynyń orynbasary Andreı Kravchenkoǵa qarata.
M.Taıjan Bas prokýratýrany tutqynǵa alynǵandarǵa qatysty sot sheshimin qaıta qaraýǵa jáne olardy merziminen buryn bosatýǵa yqpal etýge shaqyrdy.