Elimizdegi pedofılderdiń málimetter bazasy iske qosyla salysymen janjal týyndady. Pedofılder qatarynan tabylǵan Almaty turǵyny ózin zorlaýshylar tiziminen alyp tastaýdy talap etti. Bul týraly   31 arna habarlaıdy.

Kenjebek Islamov kún uzaqqa eseńgiregen kúıde. Telefony tynym tappaı shyryldap, er adamnyń týystary men dostary ony suraqtyń astyna alyp jatyr. Olar Kenjebekti pedofılder tiziminen taýyp, ań-tań.

“Bul degeniń naǵyz masqara ǵoı. Meniń otbasym, týystarym, tanystarym bar. Olar ne deıdi? Balalarymnyń kózine qaraýdan qaldym. Bul aqparat qaıdan shyqqanyn túsine alar emespin. Meniń fotom men barlyq aqparat endi eldiń nazarynda tur”, – dep ashýlandy Islamov.

Kenjebek óziniń rasymen isti bolǵanyn jasyrmady. 25 jyl buryn er adam sottalǵanyn, alaıda pedofılder qatarynda bolmaǵanyn alǵa tartty. Úsh jyl otyrǵannan keıin ony merziminen buryn bosatqan. Ol zorlaýshylar qatarynan qalaı tabylǵanyn túsinbeı dal.

Bas prokýratýra er adamnyń shaǵymdaryn estı salysymen, tergeýdi bastaǵan. Mekeme er adamnyń “toptasyp zorlaý” baby boıynsha jaýapqa tartylǵanyn alǵa tartty. Al zardap shegýshi ol kezde kámeletke tolmaǵan eken. Sol sebepti, Islamov qylmys jasaǵanyna 25 jyl ótse de pedofılder kartasyna tap bolǵan.

“Islamov kámeletke tolmaǵan jasóspirimge zorlyq kórsetý isi boıynsha jaýapqa tartylǵandyqtan, esepke alynyp, bul ınternette jarıa etildi. Eger Islamov bul fakti boıynsha ózge dáleldi aqparattar kórsete alsa, málimetter bazasyna túzetýler engiziletin bolady”, – deıdi Bas prokýratýranyń quqyqtyq statısıka boıynsha komıtet basshysy Kúljıan Jaqıanova.

Kartaǵa 1991 jyldan bastap kámeletke tolmaǵandardy zorlaý baby boıynsha jaýapqa tartylǵandar engizilgen. Iaǵnı, barlyǵy 120 adam tirkelgen.

Quqyq qorǵaýshylar mundaı málimetterdi jarıa etpes buryn ár qylmyskerdiń búgingi tańda qanshalyqty túzý jolǵa túskendigi týraly aqparat jınaǵan abzal dep sanaıdy.

“Bul adamdar otbasyn quryp, balaly, nemereli bolyp otyrǵan shyǵar? Al búginde bazaǵa jarıalanyp masqara bolýda. Menińshe, bul kúrdeli másele jáne jan-jaqty saralaýdy qajet etedi. Bul qylmysqa qaıta barmaǵan tulǵalardy bazaǵa engizýdiń qajeti joq dep oılaımyn”, – deıdi zańger Rena Karımova.

Al Kenjebek Islamov bolsa, ózin bazadan alyp tastaýyn jáne Bas prokýratýranyń keshirim suraýyn talap etýde. Tipti sotqa júginýge de ázir otyr.

Eske salsaq, aǵymdaǵy jyldyń basynan bastap, elimizdiń pedofılder bazasy quryldy. Ondaǵy málimetterdi Komıtettiń http://infopublic.pravstat.kz portalyndaǵy «Geoaqparattyq júıeler» bóliminen ınternet arqyly kóre alady.