Qarjy pıramıdasyn quryp, qarasha halyqtyń qaltasyn qaqqan «Fınstatýs» kompanıasynyń dırektory alaıaqtyq jasaǵanyn aqyry moıyndady, - dep habarlaıdy Qamshy.kz KTK arnasyna silteme jasap.

Salymshylardyń senimine kirip sońǵy tıynyna deıin sypyryp alǵanyn Aleksandr Chernenko ashyq aıtyp otyr.

Aleksandr Chernenko, «Fınstatýs» JSHS dırektory:

-Qurmetti salymshylar sizderden keshirim suraı otyryp kelesi jaǵdaıdy baıandaımyn. «Fınstatýs» kompanıasy qarjy pıramıda úshin qurylǵan. Sizder salǵan qarajat talan-tarajǵa túsip, qoldy boldy. Iaǵnı salymdar eshqandaı da jobaǵa jumsalǵan joq. Sondyqtan bankten alǵan nesıelerińizdi ózderińiz óteı berińizder.

Alaıda Aleksandr Chernenko kompanıanyń alaıaqtyq jolmen aqsha tabatynyn buǵan deıin bilgen joqpyn dep aqtaldy. Sondyqtan salymshylardyń qarajaty qaıda jumsalǵanynan da habarsyz. Biraq qyrýar aqshany qaltaǵa basqan tórt sybaılasynyń aty-jónderin ázirge ataýdan bas tartyp otyr. Bar bolǵany jarty jyl basshy bolamyn dep barmaǵyn tistegen ol qazir úıqamaqta. «Fınstatýs» kompanıasynyń barlyq esep-shottary buǵattalǵan. Al alaıaqtardyń arbaýyna túsken 2 myńǵa tarta turǵynnyń qaryzy kún sanap ósip barady. Sebebi olar kelisim boıynsha bankten alǵan nesıeleriniń 40 paıyzyn qarjy pıramıdasyna quıǵan eken. Óz kezeginde «Fınstatýs» boryshty fırma esebinen jaýyp beremiz dep ýáde beripti. Alaıda aqpan aıynan beri birde bireýiniń qaryzy jabylmaı, bank aldyndaǵy qaryzy qordalanyp ketken. Sondyqtan bul ispen endi quzyrly oryndar aınalysyp jatyr. Qalaı bolǵanda da, jurtqa alǵan qaryzdy ózderi óteýden basqa amal joq.