Aldaǵy onjyldyqta munaı men gazǵa degen suranys tómendemeıdi, - deıdi Qazaqstan Prezıdenti Nursultan Nazarbaev 

XX Peterbýrg halyqaralyq ekonomıkalyq forýmynyń plenarlyq jıynynda.
«Saýd Arabıasy munaı óndirisin amerıkalyq munaıshylardy yǵystyrý úshin úshin arttyryp otyr ma, álde Irannyń iri resýrsqa qoly jetpeýi úshin be, qalaı dep oılaısyz? Bul jalpy, qanshalyqty júzege asty? Bolashaqta munaı baǵasy qalaı bolmaq?», dep surady jıynda moderator CNN júrgizýshisi Farıd Zakarıa Qazaqstan Prezıdentinen.

Elbasy bul suraqqa: «Jıynǵa munaı salasyndaǵy iri kompanıa «Ekson Mobıldiń» basshysy Reks Tılerson qatysyp otyr, muny sol kisiden suraý kerek», dep ázil aralastyra jaýap berdi de, suraqqa qatysty óz pikirin aıtty.

«Biz búgin Reks Tılerson myrzamen kezdesip, osy tóńireginde sóılestik. Men onyń pikirin qoldaımyn, búgingi tańda munaı baǵasy 50 dollardyń aınalasynda. Múmkin, bul obektıvti shyndyq. Al, endi Saýd Arabıasy amerıkalyq munaıshylardy yǵystyryp jatyr degen taqyryp - sarapshylardyń máselesi. Búgin olar bir nárseni aıtady. Qazir sarapshylar pikirin oqyǵyń da kelmeıdi. Óıtkeni, erteń múlde basqa deıdi. Menińshe, biz pikirlerine súıenetin ekonomıser, qarjygerler qazir shatasyp qaldy. Sondyqtan, qazirgi júrip jatqan daǵdarysqa eshkim naqty baǵa bere almaıdy. Fakt - ol fakt. Men búgingi baıandamamda, baǵalardyń quldyraýynan barlyǵy da utylǵanyn aıttym. Importtaýshylar da utyldy, eksportqa shyǵarýshylardyń utylǵany belgili.    

Árıne, damýshy elder utyldy. Jalpy, bul barlyǵymyzǵa qatysty. Sondyqtan, Peterbýrg forýmynyń taqyrybyn shynaıylyqqa burý kerek. Shyndyq - ol qazirgi qalyptasqan baǵa. Jaman ba? Iá, jaman. Biraq, barlyq jamandyqtyń da jaqsy jaǵy bar. Qazir bizdiń elderimiz óndiristi damytýǵa, ındýstrıalandyrý men ózge salalardy órkendetýdi qolǵa aldy» - dedi Qazaqstan Prezıdenti.