Qaraǵandy oblysynyń ákimdigi Sibir jarasyn juqtyrdy degen kúdikpen oblystyq aýrýhanaǵa túsken aýyl turǵyndarynyń syrqaty jaıly tolyǵyraq aıtyp berdi, - dep habarlaıdy Qamshy.kz BNews.kz – ke silteme jasap.

Bıylǵy maýsymnyń 16-si kúni Qaraǵandy oblysynyń Shet aýdanyndaǵy Ýspen selolyq okrýgine qaraıtyn Erkindik aýylynyń turǵyny iri qara maldyń aýyryp turǵany týraly aýyldyń mal dárigerine habarlaǵan. Arada eki kún ótken soń, mal dárigerlerin eskertpesten, ıesi jem-shóp jemeı qoıǵan malyn soıyp, etin kórshilerine satqan.

«Et satyp alǵan sol aýyldyń eki turǵyny qoldaryna túrli jara jyǵyp, aýrýhanaǵa jatqyzylǵan. Aǵadyr kentindegi aýrýhana dárigerleriniń málimetteri boıynsha, aldyn ala «sibir jarasy» degen dıagnoz qoıylyp, oblystyq veterınarlyq ınspeksıaǵa, veterınarlyq basqarmaǵa habar berilgen", – dep málim etti oblys ákimdigi baspasóz qyzmetiniń ókili Olga Kabargına.

19 maýsym kúni aýdandyq aýmaqtyq ınspeksıa ókilderi Shet aýdanynyń veterınarıa jáne veterınarlyq stansasynyń ókilderimen birlesip, epızootologıalyq zertteý júrgizgen.

«Soıylǵan maldyń etinen, ishek-qarnynan synama alynyp, 20 maýsym kúni «Respýblıkalyq veterınarlyq zerthana» RMK-nyń Qaraǵandy oblystyq fılıalyna jáne 21 maýsymda «Ulttyq veterınarıa jónindegi referenttik ortalyǵy» RMK-ǵa joldanǵan», – dep habardar etti baspasóz qyzmeti.

Búgingi kúni Qaraǵandy oblysynyń jergilikti atqarýshy organdarymen, tutynýshylar quqyǵyn qorǵaý departamenti jáne Veterınarlyq baqylaý jáne qadaǵalaý komıtetiniń oblystyq aýmaqtyq ınspeksıasymen birlesip arnaıy shtab qurylyp otyr. Ol qazir aımaqtaǵy jaǵdaıdy qatań baqylaýǵa aldy.

Esterińizge sala keteıik, Qaraǵandy oblysynyń aýmaqtyq ınspeksıasynyń málimetteri boıynsha, 20-21 maýsymda oblystyq ınfeksıalyq aýrýhanasyna jeti adam jatqyzyldy, arasynda bala da bar. Solardyń ekeýi: er adam jáne áıel qaıtys boldy. Atalǵan eldi mekende zalalsyzdandyrý jumystary júrgizilip jatyr. «Sibir jarasy» dıagnozyn zerthana ázir rastaǵan joq.