Búgin Parlament Májilisiniń jalpy otyrysynda Baqtyqoja İzmuhambetovtyń otstavkasynan keıin, depýtattar jasyryn daýys berý arqyly palatanyń jańa tóraǵasy laýazymyna Nurlan Zaırollauly Nyǵmatýllındi saılady, - dep habarlaıdy Qamshy.kz QazAqparatqa silteme jasap.
QR Konstıtýsıasynyń 58-baby, 1 tarmaǵyna sáıkes, QR Parlamenti Májilisiniń Tóraǵasy memlekettik tildi erkin meńgergen, Májilis depýtattarynyń arasynan palata depýtattary jalpy sanynyń kópshilik daýysymen jasyryn daýys berý arqyly saılanady. Al Májilis tóraǵasynyń qyzmetine kandıdatýrany palata depýtattary usynady. Osyǵan baılanysty depýtat Qýanysh Sultanov Májilis spıkeri laýazymyna N. Nyǵmatýlınnyń kandıdatýrasyn usynǵan bolatyn. Májilistegi partıa fraksıalary basshylarynyń barlyǵy da kandıdatýrany qoldady. Tóraǵany saılaý boıynsha qurylǵan sanaq komısıasynyń málimetinshe, jasyryn daýys berýge qatysqan palatanyń 102 depýtatynyń barlyǵy biraýyzdan N. Nyǵmatýlınnyń kandıdatýrasyn jaqtap daýys bergen.
Eske sala keteıik, Elbasy Nursultan Nazarbaev QR Parlamenti Májilisiniń «Nur Otan» partıasy fraksıasynyń keshegi jıynynda Parlamenttiń aldaǵy ýaqytta atqarýshy bılikpen aradaǵy ózara is-qımyldy belsendirek júrgizýi qajettigine nazar aýdarǵan bolatyn. «Biz Úkimetke jumysty baıyppen júrgizýge múmkindik berdik, belgili bir jetistikterge qol jetkizildi. Biraq bul jetekshi saıası partıamyz «Nur Otan» men onyń fraksıasy Úkimettiń aldyna qoıylatyn mindetterdiń oryndalýyna qatań qaramaýy tıis degendi bildirmeıdi. Oryndalýy qajet strategıalyq baǵdarlamalar bar. Bizdiń óz elimizde de, shet elderde de oryndalýyn jurt baqylap otyrǵan negizgi mindetimiz - Bes ınstıtýsıonaldyq reformanyń iske asyrylýy jónindegi «100 naqty qadam» ult josparyn júzege asyrý», - degen bolatyn Memleket basshysy.
