«Qazaqstan aıtys aqyndary» dep aıqaılatyp kitap jazǵandaryn qaıteıin, ishinde Shynbolat Dildebaev joq! Kitapty qolyma alǵanda birden Shynbolatty izdedim. Tappadym. Kitapty ornyna qoıa saldym. Júrsin aǵamyz Shynbolatty umytýy múmkin emes edi. Zamanynda bir-birimen aralasqan adamdar ǵoı. Kezinde N.Nazarbaevqa arnaý jazyp, arnaýynda bar qazaqtyń muqtajyn joqtaǵan Shynbolat edi. KSRO qylyshyn súıretip turǵanda "Shyndyq" dep jyrlaǵan Shynbolat edi. N.Nazarbaev Jezqazǵanǵa kelgen saıyn kezdesetin Shynbolat edi. Kitaptan taba almaǵanymyz ókinishti. Kezinde Shynbolattyń «Shyndyǵyn» tyńdaǵan Halyq qaharmany Qasym Qaısenov «Sen shyn máninde bul beıbastaq soıqan zamannyń búgingi Buqar jyraýysyń. Sen ózińniń ádiletti ańsaýyńmen, shynshyldyǵyńmen, bet qaratpas qaısarlyǵyńmen, adamgershilik parasattylyǵyńmen, jyrshylyq mánerińmen qazaq óneriniń aspandap turǵan juldyzdarynyń eń jarqyrap, kózge túserisiń! Seniń atyńdy qoıǵan adamnyń tegin adam emes ekeni de kóńilge rızashylyq uıalatady» dep júrekjardy pikirin bildirgen eken. Sóıle, Tilim, Alańdama, tartynba, Naızaǵaıdaı shyndyqty aıtyp jarqylda! Qalaı ǵana ómir súrdim deı alam, Bir aýyz sóz qalmaǵan soń artymda?!- dep bastalatyn tolǵaýdy estigen qazaqtyń kózine jas almaǵany kemde kem. Halyqtyń oıyndaǵy, kóńilindegi, jan túkpirindegi shyndyqty dóp basqan Shynbolattaı aqyn dál sol kezde bolmady. Aqyn bir ǵana «Shyndyqpen» shektelip qalmady. Jyrlaryn jalǵastyryp, «Ashyný», «Uıat boldy-aý!» atty óleńderin ómirge ákeldi. Bul jyrlarynda da qazaqtyń muńy, qoǵamnyń derti, zamannyń qıyndyǵy ashyq kórinis tapty. Aqynnyń bul tolǵaýlaryna basty ortaq taqyryp – ulttyń keleshegi, qazaqtyń sanasynyń oıanýy arqaý boldy. Aqyn osynysymen uıyqtap jatqan qalyń eldi dúr silkindirdi. «Shyndyqty» jattap almaǵan bala, aıtpaǵan kári-jasy qalmady. «Shyndyq» qazaqtyń boıyna qan bolyp júgirdi. Aqyn Búrkit Ysqaqov «Mirjaqyp Dýlatovtyń «Oıan qazaq» jyrynan keıin batyl da ashshy jyr ol Shynbolattyń «Shyndyq» tolǵaýy boldy. Az ǵana ýaqyttyń ishinde bul jyr alys shet elderge tarap ketti» dep jazady. Rasymen de, Shynbolattaı shyndyqty kórsetken aqyndar sırek. Dastarhan basyndaǵy lırıkalyq ánderden basqany qalamaıtyn Keńestik ıdeologıa úshin mundaı tolǵaýlar jaı otyndaı edi. Jazýshy Sherhan Murtazanyń ózi Shynbolatty Mahambet pen Aqtamberdi jyraýlardyń jalǵasy dep biletindigin aıtyp, erekshe qurmetteýi osydan bolsa kerek. Búgingiler Qasym men Sherhannan, Búrkitten artyq pa eken?! Kitapqa qospaǵany uıat boldy!
Nurserik Jolbarys
