Bilim berý granttaryn bólý jónindegi respýblıkalyq konkýrstyq komısıa jumysyn aıaqtap, búgin 2016 jylǵy grant ıeleriniń tolyq tizimi jarıalandy. 2059 «Altyn belgi» ıegeriniń 45-i memlekettik grantqa ilikpegeni belgili bolyp otyr, - dep habarlaıdy Qamshy.kz BNews.kz - ke silteme jasap.
«45 «Altyn belgi» ıegeri memlekettik grant esebinen bilim almaıdy», - dep habarlady Bilim jáne ǵylym mınıstrliginen.
Keshe belgili bolǵandaı, «Altyn belgi» ıegerleriniń bári birdeı memlekettik grant esebinen oqı almaıdy. Jalpy, bıyl 2059 «Altyn belgi» ıegeri oqýyn elimizdegi ýnıversıtetterde jalǵastyrýǵa nıet bildirgen.
«Alaıda, olardyń deni básekelestik deńgeıi joǵary qarjy-ekonomıkalyq nemese áleýmettik-gýmanıtarlyq baǵyttaǵy mamandyqtardy tańdap alyp otyr. Kópshilik elimizde sońǵy jyldary ndýstrıalyq-ınnovasıalyq damý basymdyqtaryna kóp kóńil bólinip jatqanyn eskermeı keledi. Bıyl da memlekettik granttardyń kóp bóligi atalǵan basymdyqtardy júzege asyrýdy kózdep, eńbek naryǵynyń qajettilikterine baǵyttaldy», - deıdi mınıstrliktegiler.
Endigi ýaqytta joǵary oqý oryndarynyń basshylyǵymen birlesip, memlekettik granttan qaǵylǵan «Altyn belgi» ıegerleriniń isi jeke-jeke zerdelenip, olardyń JOO qarajaty esebinen bilim alý múmkindigi qarastyrylmaq.
Bilim berý granttaryn bólý jónindegi respýblıkalyq konkýrstyq komısıanyń múshesi, L.Gýmılev atyndaǵy Eýrazıa ulttyq ýnıversıtetiniń rektory Erlan Sydyqovtyń aıtýynsha, memleketttik grantqa ilikpegen «Altyn belgi» ıegerlerin joǵary oqý oryndary tegin oqytýǵa mindetti emes. Mektepti úzdik bitirgen, biraq mamandyqty durys tańdamaǵan jastardy ýnıversıtetter qarjylyq múmkindigine qaraı qabyldaıdy.
«Altyn belgi» ıegerlerin oqýǵa qabyldaýǵa ýnıversıtetter múddeli. Óıtkeni, neǵurlym talantty jastar kóbirek kelse, soǵurlym ýnıversıtettiń de kórsetkishteri joǵary bolady. Biz memlekettik grant buıyrmaǵan talapkerlerdi qabyldaı alamyz. Biraq, olardy oqytý úshin joǵary oqý ornynyń aqshalaı paıdasy bolýy kerek. Bul qarajatty baqylaý keńesteri bóledi. Eń birinshi kezekte, áleýmettik álsiz qorǵalǵan otbasylardyń balalaryna qoldaý kórsetiledi. Budan bólek, múgedek jastardyń oqýynyń aqysyn azaıtýǵa jumsalady. Eger qarajat qalsa «Altyn belgi» ıegerleri, Olımpıada jeńimpazdary, daryndy balalardy oqytýǵa qarastyrylady. Bul tek rektor sheshetin másele emes, qarajatty baqylaý keńesteri bóledi. Al eger ýnıversıtettiń tabysy bolmasa, onda grantqa ilikpegenderdi oqý ornynyń esebinen oqytý múmkin emes», - deıdi Eýrazıa ulttyq ýnıversıtetiniń rektory.
Aıta keteıik, búgin 2016 jylǵy grant ıeleriniń tolyq tizimi jarıalandy.
Esterińizge salyp ótsek, bıyl jalpy 31 myń 702 grant bólindi. Onyń 2950-i joǵary oqý oryndarynyń daıyndyq bólimderine bilim alýǵa, 28 752 grant birinshi kýrsqa qabyldaýǵa bólingen (kúndizgi oqý – 28 452, syrttaı oqý – 300 grant). Tehnıkalyq jáne tehnologıalyq mamandyqtarǵa – 12 593, pedagogıkalyq mamandyqtarǵa 5 myń, aýyl sharýashylyǵy jáne mal dárigerlik mamandyqtaryna 2 690 , medısınalyq mamandyqtarǵa 3 myń grant bólingen.+
Bilim granttaryn úlestirý konkýrsyna jalpy 59 677 adam qatysty. Olardyń 47 342-si qazaq tilinde, al 12 335-i orys tilinde bilim alatyndar. «Máńgilik el jastary - ındýstrıaǵa!» jobasynyń aıasynda kvota boıynsha konkýrsqa 9 797 adam qatysty.
