Ál-Farabı atyndaǵy QazUÝ stýdenti Dmıtrıı Balandın Rıo-de-Janeırodaǵy Olımpıada oıyndarynda «altyn» júldeni qanjyǵasyna baılady. Ol erler arasynda bras ádisimen 200 metr qashyqtyqqa júzýden úzdik kórsetikshpen jeńiske jetti. Bul qazaq sporty tarıhyndaǵy Olımpıada oıyndarynda júzýden alǵan alǵashqy altyn, - dep habarlaıdy Qamshy.kz ýnıversıtettiń baspasóz qyzmetine silteme jasap.
Dmıtrıı Balandın - ál-Farabı atyndaǵy QazUÝ-dyń dene shynyqtyrý jáne sport kafedrasynyń 4-kýrs stýdenti.
Sportshy ýnıversıtettiń aǵa oqytýshylary, sport sheberleri Andreı Hohlov pen Qýat Maqashevtardyń jetekshiligimen jattyǵady. Dmıtrıı – halyqaralyq deńgeıdegi sport sheberi, Azıa chempıonatynyń kúmis júldegeri, sondaı-aq Inchhonda ótken (Ońt.Koreıa) XVII Azıa oıyndarynyń braspen júzý ádisi boıynsha úsh dúrkin altyn medal ıegeri.
Buǵan deıin ál-Farabı atyndaǵy QazUÝ stýdenti Eldos Smetov Rıo Olımpıadasynda erler arasyndaǵy dzúdodan 60 kelige deıingi salmaqta óner kórsetip, Qazaqstan qorjynyna alǵashqy kúmis medaldi salǵan bolatyn. Eldos Smetov – dzúdodan álem chempıony, halyqaralyq dárejedegi sport sheberi.
Rıodaǵy olımpıada oıyndaryna Qazaqstannyń ulttyq quramasynda QazUÝ-dyń 17 stýdenti sporttyń 6 túrinen: júzý, aýyr jáne jeńil atletıka, dzúdo, erkin jáne grek-rım kúresinen baqtaryn synaýda.
QazUÝ stýdentteri sporttyq sheberlikterimen, jetken jetistikterimen ýnıversıtettiń elimizdegi ǵana emes, sonymen qatar halyqaralyq arenadaǵy úzdik oqý ordasy ekenin taǵy bir dáleldedi.
